रत्ननगर । चितवनमा आइबार साँझ आएको हावाहुरीले किसानको खेतमा लगाएको पाँच करोड मुल्य बराबरको केराखेती नष्ट गरेको छ । १५० विघामा लगाएको केरा पूर्णरुपमा क्षति हुँदा ५ करोड नोक्सानी भएको चितवन केरा उत्पादक संघका महासचिव जनकराज पन्तले जानकारी दिए । जिल्लाको सात पालिका मध्ये खैरहनी र राप्तीमा बढी क्षति भएको छ । रत्ननगर र कालिकामा आंशिक क्षति भएको र  अन्य पालिकाका किसानहरुको केराखेतीमा समेत हावाहुरीले ठुलो नोक्सानी गरेको छ । रत्ननगर ५ झुवानीका किसान ऋषि गुरुङले खैरहनी र राप्तीमा गरी २२ विघा क्षेत्रफलमा खेती गर्दै आएका छन् । हावाहुरीले उनको १० हजार बोट केरा नष्ट गरेको छ । १० हजार बोट केरा नष्ट हुँदा करिब ५० लाख नोक्सान भएको किसान गुरुङले जानकारी दिए । रत्ननगरका बाबुराम भट्टको ५ विघाको केरा पूर्णरुपमा क्षति भएको छ । उनले रत्ननगर ४ सेरीमा १० विघा क्षेत्रफलमा केरा खेती गर्दै आएका छन् । ५ विघाको केरा नष्ट हुँदा २५ लाख नोक्सान भएको भट्टले जानकारी दिए । “असारमा तयारी भएर बजार पठाउन योजना थियो” उनले भने हावाहुरीले सबै योजना तहसनहस भयो । रत्ननगरकै बाबुराम दुवाडीको २ विघाको केराखेती नष्ट हुँदा १० लाख क्षति भएको छ । हावाहुरीले मालभोग र जीआइन जातको केरा नष्ट गरेको छ । चितवन केरा उत्पादक संघले सोमबार विहानै देखि क्षतिको विबरण संकलन गरेको र मंगलबार सम्म यतार्थ विबरण आउने जनाएको छ । चितवनमा ७५० जना किसानले तीन हजार विघामा व्यवसायिक रुपमा केरा खेती गर्दै आएका छन् । यहाँ बार्षिक ७० हजार मेट्रिक टन अर्थात एक अर्ब ६० करोडको केरा उत्पादन हुँदै आएको छ । नेपालमा १६६१५ हे. मा २७८८९० मे. टन केरा उत्पादन हुन्छ । त्यस्तै कञ्चनपुर जिल्लाको शुक्लाफाँटा नगरपालिका–१२ का किसानले लगाएको केरा खेतीमा हावाहुरीले व्यापक क्षति पुर्याएको छ । गत बिहीबार राति आएको हावाहुरीले घरी लाग्नै लागेको बोटहरु ढालेपछि किसानले निकै क्षति व्यहोरेका हुन् । कालागौंडी, तिलकी र दमलपट्टिका १५ जनाभन्दा बढी किसानले १० बिघा जग्गामा लगाइएको केरामा हावाहुरीले ९० प्रतिशत क्षति गरेको एक किसानले बताए । उनका अनुसार हावाहुरीले ४२ हजार ५०० केराका बोट ढालेको छ । जसबाट रु एक करोड ४८ लाख ७५ हजार रकम बराबरको केरा खेतीमा किसानलाई घाटा लागेको छ । केराको बोट खरीद, लगाउने खर्च, मल, सिँचाइ गोडमेल गरी प्रतिबोट केरा रु ३५० लागत खर्च लाग्ने गरेको छ स्थानीय किसान रामआश्रय रानाले भन्नुभयो, “दश कट्ठामा लगाएको पूरै केरा हावाहुरीका कारण ढलेपछि नोक्सानी भएको छ ।” जी नौ जातको केरा रोपेका यहाँका किसानले हावाहुरीले व्यापक क्षति पुर्याउँदासमेत निरीक्षणका लागि हालसम्म सरकारी निकाय र जनप्रतिनिधि नपुगेको स्थानीय किसानले गुनासो गरेका छन ।