काठमाडौं । कथाकार गोपी मैनालीको कथाकृति ‘विशृंखलित सपना’को परिचर्चा गरिएको छ । साहित्यिक पत्रकार संघको आयोजनामा एक विशेष समारोहबीच उक्त कृतिको परिचर्चा गरिएको हो । संघका अध्यक्ष राधेश्याम लेकालीको अध्यक्षतामा भएको कार्यक्रममा साहित्यकार महेश प्रसाईं, समालोचक प्रमोद प्रधान, नियात्राकार प्रतीक ढकाल र समीक्षक अनिता कोइरालाले उक्त कृतिको परिचर्चा गर्नु भएको थियो ।

कार्यक्रममा प्राडा.अर्जुनदेव भट्टले ढाका टोपी र अध्यक्ष लेकालीले फूलको माला लगाइ दिएर मैनालीलाई स्रष्टा सम्मान गरिएको थियो । नियात्रा, निबन्ध र समालोचना आफ्नो पकड बनाउनुभएका मैनालीको यो पहिलो कथा कृति हो । सुरभि साहित्य प्रतिष्ठान गोकर्णेश्वर काठमाडौंले प्रकाशन गरेको यो कृतीमा सत्र कथा समावेश गरिएको छ ।

कवि मुरारी सिग्देलले सहजिकरण गर्नुभएको कार्यक्रममा वरिष्ठ समालोचक युवराज मैनालीले स्वागत एवं कार्यक्रमको उद्देश्य र महत्वबारे प्रकाश पार्नु भएको थियो । कृतिकार गोपी मैनालीले आफ्नो सिर्जनाबारे मन्तव्य राख्नु भएको थियो ।