काठमाडौं । पानीमा आश्रित चराको गणना चितवनमा सकिएको छ ।बसाइँसराइ गरी नेपाल आउने पानीमा आश्रित चराको राप्ती, नारायणी नदी र विभिन्न तालतलैयाहरूमा गणना गरिएको बर्ड एजुकेसन सोसाइटी चितवनका अध्यक्ष टिकाराम गिरीले बताए । चराविज्ञको विभिन्न टोली बनाएर गणना गरिएको थियो ।

यही जनवरी ७ देखि गरिएको गणनामा चितवनको पूर्वी क्षेत्रमा पानीमा आश्रित ५३ प्रजातिका चरा भेटिएको उनले जानकारी दिए । उनका अनुसार, पूर्वी चितवनको लोथरको गैडहवा जिन्दगानी घाटदेखि पटना तालसम्म चरा गणना गरिएको थियो ।

चितवन राष्ट्रिय निकुञ्जको कसरा पुलदेखि पश्चिम क्षेत्रमा ६१ प्रजातिका पानी चरा भेटिएको पश्चिम क्षेत्रका टोली प्रमुख मनीषकुमार लिम्बूले बताए । त्यसमध्य पानीहाँस चखेवाको संख्या सबैभन्दा धेरै पाइएको थियो । त्यहाँ पानीमा आश्रित करिब १४ हजार चरा भेटिएको उनको भनाइ छ ।

गणनाका क्रममा गत वर्ष नभेटिएका चार प्रजातिका चरा पूर्वी क्षेत्रमा देखिएको थियो । पानीमा आश्रित चराको गणना सन् १९८७ देखि नेपाललगायत दक्षिणपूर्व एसियाका ३५ देशमा प्रत्येक जनवरी महिनामा एकसाथ गरिँदै आएको छ ।