काठमाडौँ । नेपाल निजामती कर्मचारी युनियनले अध्यागमन कार्यालय, त्रिभुवन अन्तर्राष्ट्रिय विमानस्थलका प्रमुख अध्यागमन अधिकृत सहितका कर्मचारीमाथि प्रहरीबाट भएको हातपात एवम् दुर्व्यवहारको घटनाप्रति गम्भीर ध्यानाकर्षण भएको जनाएको छ । युनियनका महासचिव जनक बहादुर रावलले शुक्रवार विज्ञप्ति निकालेर निजामती प्रशासनमाथि प्रहरीबाट हुने अस्वाभाविक गतिविधिको घोर भर्त्सना गरेका छन् ।
‘विगत केही समयदेखि प्रहरीबाट निजामती कर्मचारीमाथि हातपात गर्ने, असान्दर्भिक विषयमा समेत धरपकड गर्ने, मुद्दा लगाउने जस्ता अनावश्यक हस्तक्षेपका कार्य भएको गुनासो सुनिँदै आएको छ’ विज्ञप्तिमा भनिएको छ’, ‘निजामती कर्मचारीलाई आफ्नो कार्यालयमा शान्तिपूर्ण तवरले काम गर्न सक्ने समुचित वातावरण बनाउन तथा यस प्रकारका अवाञ्छित गतिविधिमा संलग्न प्रहरीउपर कानुनी कारबाही गर्न नेपाल सरकारसँग जोडदार माग गर्दछौँ ।’
निजामती प्रशासनमाथि हुने कुनै पनि प्रकारको गैरकानूनी हस्तक्षेपको नेपाल निजामती कर्मचारी युनियनले डटेर प्रतिवाद गर्ने र यस्ता गतिविधि नरोकिएमा आन्दोलन गर्न समेत बाध्य हुने विज्ञप्तिमा उल्लेख छ । विमानस्थल अध्यागमन कार्यालयका प्रमुख अध्यागमन अधिकृत गोगन बहादुर हमाल र अध्यागमन अधिकृत छायालाल मोक्तान लगायतका कर्मचारीहरूमाथि कार्यालय समयमा अध्यागमनको सुरक्षाको लागि खटिएका सुरक्षाकर्मीहरूबाट कुटपिट र हातपात भएको थियो ।
