काठमाडौँ । स्थानीय बजारमा बुधबार सुनको मूल्य एकै दिन तोलामा एक हजार दुई सय रुपियाँले घटेको छ ।

मङ्गलबार प्रतितोला एक लाख १७ हजार सात सय रुपियाँमा कारोबार भएको सुनको मूल्य बुधबार घटेर एक लाख १६ हजार पाँच सय रुपियाँमा कारोबार भएको नेपाल सुनचाँदी व्यवसायी महासङ्घले जनाएको छ ।

आइतबार एक लाख १८ हजार छ सय रुपियाँमा कारोबार भएको सोमबार सामान्य बढेर एक लाख १९ हजार दुई सय रुपियाँमा कारोबार भएको थियो । पछिल्लो समय अन्तर्राष्ट्रिय बजारमा सुनको मूल्य घटेकाले त्यसको प्रभाव स्थानीय बजारमा पर्न गएको हो ।

मङ्गलबार अन्तर्राष्ट्रिय बजारमा सुनको मूल्य प्रतिऔँस दुई हजार २० डलर रहेकोमा बुधबार घटेर प्रतिऔँस एक हजार ९९३ डलरमा झरेको छ । पछिल्लो दुई सातादेखि सुनको मूल्य लगातार घट्दै गएको छ । दुई साताको अवधिमा बजारमा सुनको मूल्य तोलामा दुई हजार रुपियाँले कमी आएको महासङ्घले जनाएको छ ।

सुनचाँदी व्यवसायी तेजरत्न शाक्यले दुई सातादेखि लगातार सुनको मूल्य घट्दै गएको जानकारी दिनुभयो । अन्तर्राष्ट्रिय बजारमा सुनको आपूर्ति बढेको र माग कम भएकाले मूल्य घट्दै गएको उहाँको भनाइ छ । लगानीकर्ताहरू बजारमा सुन बिक्री गर्न आएकाले पनि मूल्य घट्दै गएको उहाँको भनाइ छ । सुनको मूल्य लगातार घट्दै गए पनि बजारमा कारोबार भने बढ्न सकेको छैन । लगनको सिजन भए पनि बजारमा माग न्यून हुँदा सुनको कारोबार बढ्न नसकेको व्यवसायीको भनाइ छ ।

महासङ्घका अनुसार गत वर्ष माघ फागुनमा दैनिक ४० देखि ५० किलो सुनको माग हुने गरेकोमा अहिले आधाले घटेर दैनिक २० देखि २५ किलोमा झरेको छ । उपभोक्ताको क्रयशक्ति न्यून हुँदा बजारमा माग बढ्न नसकेको व्यवासयीको भनाइ छ । नयाँ गहना किन्नेभन्दा पनि पुराना गहना बिक्री गर्न धेरै ग्राहक आउने गरेको व्यवसायीको भनाइ छ ।

यसैबिच बजारमा चाँदीको मूल्यसमेत घटेको छ । मङ्गलबार प्रतितोला एक हजार ३९५ रुपियाँमा कारोबार भएको चाँदीको मूल्य बुुधबार तोलामा ३० रुपियाँले घटेर एक हजार ३६५ रुपियाँमा कारोबार भएको महासङ्घले जनाएको छ ।