काठमाडाैं । प्रतिनिधि सभाका सदस्य एकनाथ ढकालले बिनियोजन बिधेयक २०८१ का सिद्धान्त र प्राथमिकता बारे छलफलमा भाग लिँदै विभिन्न सुझाव दिएका छन्।
सांसद ढकालले बजेटको प्राथमिकतामा कृषि उत्पादनमा बृद्धि गरि निर्यात बढाउने र आयात घटाउने गरि राष्ट्रिय अर्थतन्त्रको विकास गर्ने, पर्यटनको थप बिकासको लागि आवश्यक भौतिक पूर्वाधारको निर्माणमा जोड दिँदै हस्पिटालिटी व्यावशायलाई प्रोत्शाहन गर्नुका साथै पोखरा र भैरहवा अन्तर्राष्ट्रिय विमानस्थललाई पूर्ण क्षमतामा संचालन गर्ने, जलबिद्युत विकासमा जोड दिँदै जलाशययुक्त बुढी गण्डकी जलबिद्युत आयोजनालाइ सबैभन्दा प्राथमिकतामा राखेर काम गर्नु पर्ने बताए।
पूर्वमन्त्री समेत रहेका ढकालले पर्यटन आवगमन र बिद्युत उत्पादनमा केही बृद्धिबाहेक नेपाली अर्थतन्त्रका अन्य प्राय सबै सूचकहरु सन्तोषजनक नरहेकाे बताए। “राजस्व संकल लक्ष अनुरुप नहुनु, वित्तीय क्षेत्र अन्तर्गत सहकारी र लघुवित्तमा गम्भीर समस्या देखिनु ,ऋणको दायित्व भुक्तानी गर्न ठुलो रकम छुट्याउनु पर्ने, संकलित राजस्वले अनिवार्य दायित्व धान्न नसक्ने, ब्यापार घाटा लगाएतका कारण वर्तमान नेपाली अर्थतन्त्र चुनौतीपूर्ण छ भन्ने देखिन्छ,” ढकालले भने।
वर्तमान अर्थतन्त्रका चुनौतीको समाधान गर्न उच्च र दिगो आर्थिक बृद्धि गर्ने, उत्पादनको विकास र रोजगारीको सृजना गर्ने, गरिबी निवारण गर्ने, दिगो बिकासका लक्ष्य हासिल गर्न सक्ने बजेट अहिलेको आबस्यकता रहेकोमा यस बिनियोजन विधेयकका सिद्धान्त र प्राथमिकताहरु यो आबस्यकताको सम्बोधन गर्ने खालको नभएको नभई कर्मकाण्डी मात्र भएको भन्दै विधेयकको परिमार्जन र पुनर्लेखनमा उनको जोड थियो।
सांसद ढकालले बिनियोजन विधेयकका सिद्धान्तमा उल्लेख गरिएका प्राय सबै बिषयहरु बिगतको निरन्तरता मात्र छ भन्दै परम्पराको निरन्तरताले मात्रै नया लक्षहरु हँसिल हुन नसक्ने बताए।
ढकालले भने, “बिनियोजन विधेयकका सिद्धान्तमा छुटाउन नहुने बिषयहरु भनेको, शान्ति संबेदनशील बिकासको अबधारणा, “वातावरण मैत्री बिकासको अबधारणा” नैतिकवान समाजको सृजना र मानबिय मुल्यमान्यताको जगेर्ना पनि हो”। आर्थिक विकास र सुशासन प्राय सबै राजनैतिक दलको एजेन्डामा परेपनि बिकासको मोडेल र सुशाशनको मापदण्डमा दलहरु प्रष्ट हुनु पर्ने उनको भनाइ थियो।
सांसद ढकालले ‘समृद्ध नेपाल, सुखी नेपाली’ को लक्ष्य हासिल गर्न आगामी बजेट केन्द्रित हुनु पर्ने बताउँदै १५औँ पञ्चवर्षीय योजनामा समृद्ध नेपाल, सुखी नेपालीको लक्ष्य प्राप्तिको लागि समृद्धिका ३२ वटा सूचक र सुखका २३ वटा सूचक गरि ५५ सूचक सार्वजनिक गरेको प्रसंग स्मरण गर्दै आगामी बजेट यसकै वरिपरिमा आउने विश्वास व्यक्त गरे।
