काठमाडौं । तपाईंको हाँसोले सकारात्मक व्यक्तित्वलाई दर्शाउँछ। हाँस्नु तथा मुस्कुराउनुले शरीरको रोग प्रतिरोधी क्षमता बढाउँछ। किनकि, यसबाट पर्याप्त मात्रामा सेता रक्तकोषको निर्माण हुन्छ र विभिन्न खाले हर्मोनको उत्सर्जन पनि हुन्छ।

यी हुन् लाभ

सम्पूर्ण शरीरलाई आराम दिलाउँछ। हाँसोले शारीरिक र मानसिक तनाव हटाउन मद्दत गर्नुका साथै मांसपेशीलाई ४५ मिनटसम्म आराम दिलाउँछ।

रोग प्रतिरोधी क्षमतामा वृद्धि

तनाव जति हुन्छ, उति नै शरीरको रोग प्रतिरोधी क्षमता कमजोर हुन्छ। हाँसोले तनावका हर्मोनलाई घटाई प्रतिरोधी कोष र संक्रमणविरुद्ध लड्ने एन्टीबडी वृद्धि गर्छ। यसले रोगसँग लड्ने क्षमतामा वृद्धि गर्छ। हाँस्दा ज्येष्ठ नागरिकमा अल्जाइमर रोग पनि लाग्न पाउँदैन।

स्वस्थ रहने रसायन बढाउँछ

हाँस्ने बानीले स्वस्थ रहन मद्दत गर्ने इन्डोर्फिन नामक रसायन वृद्धि गर्नुका साथै अस्थायी रूपमा पीडा हटाउन पनि सहयोगी भूमिका वहन गर्छ।

मुटुको रक्षा

यसले रक्तनलीको कार्यमा सुधार गर्छ, जसले रक्त सञ्चारमा वृद्धि हुन्छ। यस्तो अवस्थामा हृदयाघात हुने र मुटुका अन्य प्रकारका रोग लाग्ने सम्भावना कम हुन्छ।

क्यालोरीको खपत

दैनिक १० देखि १५ मिनटसम्म हाँस्नाले ४० क्यालोरीसम्म घटाउन सकिन्छ। यसको अर्थ वर्षभरि निरन्तरता दिने हो भने ३ देखि ४ पाउन्डसम्म तौल घट्छ।

मुड ठीक हुन्छ

हाँस्दा मस्तिष्कका कोशिकाबाट निस्कने इन्डोर्फिन नामक रसायनले मुड ठीक गर्न मद्दत गर्छ। मुड ठीक हुनुको अर्थ हो, जीवनका सबै कुरा राम्रो हिसाबले चल्नु। मुड ठीक हुँदा मानिसको व्यक्तिगत, सामाजिक र व्यवसायिक जीवन सबैमा सकारात्मक प्रभाव पर्छ। यस्तै, हाँस्ने बानीले बिनातनाव कुनै पनि प्रकारका अप्ठेरोसँग जुध्ने क्षमतामा वृद्धि गर्छ।

आयु बढाउँछ

नर्वेमा गरिएको एक अध्ययनले जो मानिसमा हाँसोको भावना हुन्छ, ऊ नहाँस्ने मानिसभन्दा बढी समयसम्म बाँचेको पाइएको थियो।

बौद्धिक स्तरमा वृद्धि

मानिसको मस्तिष्कका लागि हरसमय धेरै नै अक्सिजन आवश्यक हुन्छ। हाँस्ने बानीले मस्तिष्क मात्र नभई शरीरका सम्पूर्ण अंगमा अक्सिजन आपूर्ति गर्छ। यसले बौद्धिकस्तरका साथै शारीरिक दक्षता पनि बढाउँछ।