काठमाडौं । नेपालका पर्यटकीय गन्तव्यको देश-विदेशमा प्रचारप्रसार तथा प्रवर्द्धन गर्ने प्रमुख सरकारी निकाय हो पर्यटन बोर्ड । तर बोर्ड दुई महिनादेखि प्रमुख कार्यकारी अधिकृत (सीईओ) विहीन छ ।

माघ तेस्रो साता पदावधि सकिएर बोर्डको प्रमुख कार्यकारी अधिकृत (सीईओ) बाट डा. धनञ्जय रेग्मी बाहिरिएसँगै बोर्ड नेतृत्वविहीन भएको हो । तत्कालीन सीईओ धनन्जय रेग्मीको कार्यकाल गएको माघ १६ गते सकिएको थियो ।

सरकारले पर्यटन बोर्ड सञ्चालक समितिमा रिक्त तीन सदस्य नियुक्त गर्न पनि सकेको छैन । यसरी सीईओ र सञ्चालक समिति सदस्यहरू नियुक्त गर्न नसक्दा पर्यटन बोर्डले दुई महिनादेखि अन्तर्राष्ट्रिय बजारमा नेपालको पर्यटन प्रवर्द्धनका कुनै पनि गतिविधि तथा कार्यक्रम गर्न सकेको छैन ।

सीईओ छनोटका सरकारले लागि चक्र बुढा, मदन आचार्य र मिलन देवकोटा रहेको तीन सदस्यीय समिति गठन गरेको थियो । समितिले सीईओ छनोटका लागि कार्यविधि बनाइसकेको एक सदस्यले जानकारी दिए । आउँदो अप्रिल सिजनका लागि अहिले बुकिङको समयमा हो । यही समयमा पर्यटन बोर्ड नेतृत्वविहीन छ । प्रमुख कार्यकारी अधिकृत मात्रै होइनन्, सञ्चालक समितिमा ११ सदस्य रहने व्यवस्था भएकोमा अहिले ६ जना मात्रै छन् ।

बोर्ड सीईओका लागि आवेदन खुला नहुँदा पनि पूर्व सीईओदेखि पर्यटन व्यवसायीहरूले चासो देखाएको स्रोत बताउँछ । स्रोतका अनुसार पूर्व सीईओहरू दिपक जोसी, प्रवेश अर्याल, हिक्मत सिंह, राजाराम गिरी, ज्ञानेन्द्र राई, कासी भन्दारी, तिलक लामसहितले चासो देखाएका छन् ।

बोर्ड नेतृत्वविहीन भएपछि तत्कालीन पर्यटनमन्त्री सुदन किराँतीले नयाँ सीईओ नियुक्तिका लागि तयारी थालेका थिए । तर, त्यसको केही समयपछि नै सत्ता गठबन्धन परिवर्तन भयो ।

सरकार परिवर्तन भएसँगै हितबहादुर तामाङ संस्कृति, पर्यटन तथा नागरिक उड्डयनमन्त्री बने । उनी मन्त्री भएको पनि महिना पुग्न लागिसकेको छ । तर, पर्यटन बोर्डका लागि सीईओ छनोट प्रक्रिया भने अझै अघि बढ्न सकेको छैन ।

यस्तै, निजी क्षेत्रको सिफारिसमा संस्कृति पर्यटन तथा नागरिक उड्डयन मन्त्रालयले प्रमुख कार्यकारी अधिकृत नियुक्त गर्ने गरिएकोमा सर्वोच्चको आदेशपछि मन्त्रिपरिषद्ले निर्णय गर्नुपर्ने भएको छ । विश्व बजारमा पर्यटन क्षेत्रको प्रमोसन र मार्केटिङ गर्ने उद्देश्यले २५ वर्ष पहिले सार्वजनिक–निजी साझेदारी (पीपीपी) मोडेलमा बोर्डको स्थापना गरिएको थियो ।