गोरखा लायन्स आँखा सेवा केन्द्रमा संचालित मोतियाविन्दुको शल्यक्रिया शिविर सम्पन्न भएको छ । तीन दिनसम्म संचालन भएको शिविरमा ३८ जनाको मोतियाविन्दुको सफल शल्यक्रिया भएको छ । २७ जना महिला र ११ जना पुरुषले सेवा लिएका हुन् । केन्द्रको आयोजनमा गत सोमवारदेखि शिविर संचालन भएको हो ।

गोरखा, तनहुँको बन्दिपुर गाउँपालिका र धादिङ जिल्लाबाट पनि सेवा लिन आएको केन्द्रका प्रमुख प्रशासकीय अधिकृत विश्वप्रकाश अर्यालले बताए । केन्द्रले हरेक महिनाको १९,२० र २१ गते नियमित रुपमा मोतियाविन्दुको शल्यक्रिया शिविर संचालन गरिरहेको छ । शिविरमा मोतियाविन्दुको समस्या भएकालाई केन्द्रमा बोलाएर शल्यक्रिया गर्ने गरेको अर्यालले बताए ।