सल्यान । जिल्लाको धार्मिक तथा पर्यटकीयस्थलको रुपमा परिचित प्यागोडाशैलीमा निर्माणाधीन खैराबाङ भगवती मन्दिरमा नयाँ वर्ष तथा चैते दसैंको पञ्चमीमा भक्तजनहरुको भीडभाड बढेको छ ।

शारदा नगरपालिका ११ मा रहेको खैराबाङ भगवती मन्दिरमा पूजाआजा गर्न आउनेहरुको भीड बढेको हो । भक्तजनको घुइँचोले मन्दिर आसपासमा चहलपहल मात्रै बढेको छैन, व्यापार व्यवसाय पनि फस्टाएको छ ।

मन्दिर धार्मिक क्षेत्र विकास समितिका अध्यक्ष छविकुमार शर्माले चैते दसैंको शनिबार पञ्चमी भएकाले भक्तजनहरु धेरै आएको बताए । उनका अनुसार शनिबार ३ हजारभन्दा बढी भक्तजनहरुले खैराबाङ मन्दिर दर्शन गरेका थिए । सय जति गाडीमा जिल्ला बाहिरबाटसमेत दर्शनार्थी आएका थिए ।

वार्षिक १ लाख ५० हजार भक्तजन आउने गरेकोमा चैते दसैं सुरु भएयता ५ हजारभन्दा बढी दर्शनार्थी आइसकेका उनले जानकारी गराए । पुरातत्व विभागले प्यागोडाशैलीमा खैराबाङ भगवती मन्दिर निर्माण गरिरहेको छ । प्रत्येक वर्ष मन्दिर दर्शन गर्नका लागि सबैभन्दा बढी दाङबाट दर्शनार्थी आउने गरेको उनले जानकारी गराए । त्यस्तै बाँकेको नेपालगन्ज, सुर्खेत, जाजरकोट, रुकुम, रोल्पा, लमही, धनगढी, बुटवल, काठमाडौं र भारतका केही ठाउँबाट भक्तजनहरु आउने गरेका छन् ।

‘धार्मिक शास्त्रअनुसार खैराबाङ भगवती मन्दिर नेपालमा रहेका ५१ शक्तिपीठमध्येका एक पवित्र मन्दिरको रुपमा चिनिँदै आएको छ । वि.स. १४८० देखि मन्दिरमा पूजाआजा सुरु गरेको किम्बदन्तीमा उल्लेख छ । पुरानो शैलीमा रहेको भगवती मन्दिर २०४० सालमा स्व. राजा वीरेन्द्रले आधुनिक भवन निर्माण गराएका थिए,’ उनले भने ।