काठमाडौं । अमेरिकामा इजरायल विरुद्धको विद्यार्थी आन्दोलन झन् हिंसात्मक बन्दै गएको छ । देशका दुई दर्जनभन्दा बढी विश्वविद्यालयमा विद्यार्थी आन्दोलनमा छन् । हालसम्म दुई हजारभन्दा बढी विद्यार्थी पक्राउ परेका छन् । यस्तो अवस्थामा यो विरोध अहिले अमेरिकाबाट बढेर क्यानडाका विश्वविद्यालयहरूमा पुगेको छ ।

क्यानडाका धेरै विश्वविद्यालयका विद्यार्थीहरूले गाजामा इजरायलको आक्रमणको विरुद्ध आवाज उठाइरहेका छन्। विद्यार्थीहरूले क्यानडाको टोरन्टो विश्वविद्यालय र मोन्ट्रियलको म्याकगिल विश्वविद्यालयमा प्रदर्शन गरेका छन् ।

क्याम्पसमा नै पाल टाँगेर यी विद्यार्थीले विरोध गरिरहेका छन् । यसबाहेक भिक्टोरिया विश्वविद्यालय, भ्यानकुभर आइल्याण्ड युनिभर्सिटी र ओटावा विश्वविद्यालयमा पनि विद्यार्थी प्रदर्शन भइरहेका छन् ।

क्यानाडाका विद्यार्थीहरूको माग अमेरिकी विद्यार्थीहरूको जस्तै छ। उनीहरुको माग गाजामा तत्काल स्थायी युद्धविरामको हो । साथै, विश्वविद्यालयहरूले इजरायलसँग जोडिएका उत्पादन वा कम्पनीहरूबाट आफूलाई टाढा राख्नुपर्ने माग पनि गरेका छन् ।

अब राष्ट्रपति जो बाइडेन र पूर्व राष्ट्रपति डोनाल्ड ट्रम्प अमेरिकामा इजरायल विरोधी प्रदर्शनलाई लिएर फेरि आमनेसामने भएका छन् । एकातिर ट्रम्पले यी प्रदर्शनहरूमा आफूले अमेरिकामा जिहादलाई कुनै पनि हालतमा नसहने बताएका छन् । राष्ट्रपति बाइडेनले हिंसालाई गलत भनेका छन्।

अमेरिकी राष्ट्रपति जो बाइडेनले अमेरिकामा भइरहेको इजरायल विरोधी प्रदर्शनप्रति प्रतिक्रिया व्यक्त गरेका छन् । बाइडेनले भने – अमेरिकामा हामी जनताको अधिकारको सम्मान र संरक्षण गर्छौं ताकि उनीहरूको आवाजलाई बेवास्ता नगरियोस्। तर यसका लागि कुनै पनि हालतमा हिंसा, तोडफोड र घृणाको सहारा लिन सकिँदैन।