काठमाडौं । ओपनएआईले सोमबार आफ्नो नयाँ कृत्रिम बुद्धिमत्ता अर्थात् एआई मोडेल सोरा सार्वजनिक गरेको घोषणा गरेको जसले टेक्स्ट बाट भिडियो बनाउन सक्छ। यो सेवा अब च्याटजीपीटी प्लस र प्रो प्रयोगकर्ताहरूका लागि उपलब्ध भएको छ। यससँगै ओपनएआईले मल्टिमोडल एआई प्रविधिमा आफ्नो उपस्थिति विस्तार गरेको छ।
माइक्रोसफ्टद्वारा समर्थित यो कम्पनीले नोभेम्बर २०२२ मा च्याटजीपीटीको सुरुवातपछि जेनेरेटिभ एआईको लोकप्रियता बढाएको थियो। ओपनएआईले सोरा टर्बो मार्फत मेटा, गुगल, र स्टेबिलिटी एआईका टेक्स्ट-टु-भिडियो उपकरणहरूसँग प्रतिस्पर्धा गर्ने लक्ष्य राखेको छ।
सोरा पहिलो पटक फेब्रुअरीमा परिचय गराइएको थियो तर यो अनुसन्धान पूर्वावलोकन चरणमा सुरक्षा परीक्षकहरूका लागि मात्र उपलब्ध थियो। अहिले भने यो प्लस र प्रो प्रयोगकर्ताहरूलाई अतिरिक्त शुल्कबिना उपलब्ध गराइएको रोयटर्सले उल्लेख गरेको छ।
कम्पनीले आफ्नो ब्लग पोस्टमा भनेको छ, “हामी विभिन्न प्रकारका प्रयोगकर्ताहरूका लागि उपयुक्त मूल्य निर्धारणमा काम गरिरहेका छौँ, जसलाई हामी अर्को वर्षको शुरुवातमा सार्वजनिक गर्नेछौँ।”
सोराले प्रयोगकर्ताहरूलाई १०८०पी सम्मको रेजोल्युशनमा २० सेकेन्डसम्मको भिडियो बनाउने सुविधा दिनेछ। प्रयोगकर्ताहरूले वाइडस्क्रिन, भर्टिकल, वा स्क्वायर अनुपातमा भिडियो बनाउन सक्नेछन्।
तर यो सुविधा हाल यूरोपेली संघका देशहरू, स्विट्जरल्यान्ड र बेलायतमा उपलब्ध हुनेछैन। अन्य क्षेत्रहरूमा जहाँ च्याटजीपीटी उपलब्ध छ, त्यहाँ भने प्रयोगकर्ताहरूले यो सुविधा उपयोग गर्न सक्नेछन्।
रोयटर्सका अनुसार ओपनएआईले सोरा दुरुपयोग रोक्नका लागि कदमहरू चालेको छ। कम्पनीले बाल यौन शोषण सामग्री र यौनजन्य डीपफेक जस्ता हानिकारक सामग्रीको सिर्जना र अपलोडलाई प्रतिबन्ध लगाएको छ।
“व्यक्तिहरूको अपलोड सुरुवातमा सीमित हुनेछ, तर हामी हाम्रो डीपफेक निवारण सुधार गर्दै यो सुविधा थप प्रयोगकर्ताहरूका लागि उपलब्ध गराउने योजना बनाउँदैछौँ,” कम्पनीले बताएको छ।(एजेन्सी)
