काठमाडौं । जर्मन चान्सलर ओलाफ स्कोल्जले विश्वासको मत गुमानुभएको छ । सोमबार जर्मनीको संसद्को ७३३ सिट भएको तल्लो सदन (बुन्डेस्टाग)मा स्कोल्जलाई बहुमतका लागि ३६७ सांसदको समर्थन आवश्यक थियो । तर उहाँले २०७ सांसदको मात्र समर्थन पाउनुभएको हो ।
उहाँको विपक्षमा ३९४ मत खस्यो । अन्य ११६ सांसद भने अनुपस्थित रहेका थिए । यससँगै फेब्रुअरीमा त्यहाँ प्रारम्भिक निर्वाचन हुने सम्भावना देखिएको छ । नोभेम्बर ६ मा तीन दलको गठबन्धन पतन भएपछि स्कोल्जले अल्पमत सरकारको नेतृत्व गरेका थिए ।
जर्मनीको स्थिर अर्थतन्त्रलाई पुनरुत्थान गर्ने मार्गबारे उत्पन्न विवादका कारण स्कोल्जले हालै आफ्नो अर्थमन्त्रीलाई बर्खास्त गर्नुभएको थियो । जसका कारण गठबन्धन सरकारमा असमझदारी पैदा भएको थियो । प्रमुख दलका कयौं नेताहरू निर्धारित समयभन्दा सात महिनाअगावै फागुन १३ गते संसदीय निर्वाचन गराउन सहमत भएका थिए ।
दोस्रो विश्वयुद्धयता जर्मनीको संविधानले बुन्डेस्टागलाई भंग गर्ने अनुमति दिएको छैन । त्यसैले पनि स्कोल्जले विश्वासको मत पाउनु आवश्यक थियो । संसद्लाई भंग गर्ने कि नगर्ने र चुनाव गराउने हो कि होइन भन्ने कुराको निर्धारण अब राष्ट्रपति फ्रान्क–वाल्टर स्टेनमेयरले गर्नुपर्नेछ ।
चुनाव गराउने वा स्थगित गर्ने निर्णय गर्न राष्ट्रपति स्टेनमेयरसँग अब २१ दिनमात्रै बाँकी छ । जर्मनीको नियम अनुसार संसद् विघटन भएपछि ६० दिनभित्र निर्वाचन गरिसक्नुपर्छ । बजेट र आर्थिक नीतिहरूमा असहमति उत्पन्न भएपछि स्कोल्जले नोभेम्बरमा पूर्ववित्तमन्त्री क्रिश्चियन लिन्डनरलाई बर्खास्त गर्नुभएको थियो । त्यसपछि क्रुद्ध बनेको लिन्डनरको फ्रि डेमोक्रेटिक पार्टी गठबन्धनबाट बाहिरिएको थियो ।(एजेन्सी)
