काठमाडौं । युरोपेली सङ्घ (इयु) प्रमुख उर्सुला भन डेर लेयनले मङ्गलबार यो हप्ता लागू हुने अमेरिकी करहरूको ‘वार्ता समाधान’ का लागि ब्लकले अझै आशा गरेको तर आवश्यक परेमा जवाफी कारबाही गर्न ‘सबै उपकरण टेबलमा रहेको’ बताउनुभएको छ ।
“हामी वार्ताका लागि खुला छौँ”, युरोपेली आयोगका प्रमुखले युरोपेली संसद्को सत्रमा भन्नुभयो, “तर आवश्यक परेमा बदला लिने हाम्रो बलियो योजना छ ।”
अमेरिकी राष्ट्रपति डोनाल्ड ट्रम्पले धेरै देशविरुद्ध मङ्गलबार राति जतिसक्दो चाँडो करहरूको नयाँ समूह घोषणा गर्ने तयारी गर्नुभएको छ । यसलाई उहाँले कथित अनुचित व्यापार असन्तुलनलाई सुधार गर्न ‘मुक्ति दिवस’ भन्नुभएको छ ।
“हामी भोलिको घोषणाहरूलाई हाम्रो प्रतिक्रियालाई क्यालिब्रेट गर्न सावधानीपूर्वक मूल्याङ्कन गर्नेछौँ”, भन डेर लेयनले भन्नुभयो । उहाँले ‘अर्को चरण’ मा इयु नेताहरूसँग परामर्श गरिरहनुभएको थियो ।
आयोगले २७–देश ब्लकको व्यापार नीतिको नेतृत्व गर्दछ र व्यापार युद्धबाट बच्न संयुक्त राज्य अमेरिकासँग छलफलको प्रभारी रहेको छ ।
“युरोपले यो विवाद सुरु गरेको छैन”, उहाँले भन्नुभयो, “हाम्रो उद्देश्य वार्ताको माध्यमबाट समाधान हो । तर निस्सन्देह, यदि आवश्यक परेमा हामी हाम्रो हित, हाम्रा जनता र हाम्रा कम्पनीहरूको रक्षा गर्नेछौँ ।” उहाँले प्रतिज्ञा गर्दै युरोपले ‘एकता र दृढ सङ्कल्प’ का साथ प्रतिक्रिया दिने बताउनुभयो ।
ट्रम्पको आक्रामक कर रणनीतिले विश्वव्यापी व्यापार युद्धको डर बढाइरहेको छ । चीन, क्यानाडा र इयु जस्ता प्रमुख व्यापारिक साझेदारहरूको प्रतिशोधको शृङ्खला प्रतिक्रियाको जोखिम उत्पन्न गर्दैछ ।
जनवरीमा ट्रम्प सत्तामा फर्किएपछि इयु बिहीबारदेखि लागु हुने अटो आयातमा २५ प्रतिशत करसहित धेरै अमेरिकी कर घोषणाद्वारा प्रभावित भइसकेको छ ।
ब्लकका उत्पादकहरू विश्वभरबाट स्टिल र एल्युमिनियममा २५ प्रतिशत अमेरिकी करबाट पनि प्रभावित भएका थिए । यसमा ब्रसेल्सले अप्रिलको मध्यमा सुरु गर्ने प्रति–कारवाहीहरू पहिले नै प्रतिज्ञा गरिसकेको छ ।
उता निक्कै विरोधका बीच अमेरिकी राष्ट्रपति डोनाल्ड ट्रम्पले बुधवार पारस्परिक कर सम्बन्धी कार्यकारी आदेशमा हस्ताक्षर गर्नुभएको छ । कार्यकारी आदेशमा भनिएको छः ‘अन्यथा व्यवस्था गरिएको बाहेक सबै आयातहरूमा १० प्रतिशत अतिरिक्त कर लगाइनेछ । यो अप्रिल ५ देखि लागू हुनेछ ।’ चीनले ३४ प्रतिशत, युरोपेली संघले २० प्रतिशत, भियतनामले ४६ प्रतिशत, जापानले २४ प्रतिशत, भारतले २६ प्रतिशत, दक्षिण कोरियाले २५ प्रतिशत, थाइल्याण्डले ३६ प्रतिशत, स्विट्जरल्याण्डले ३१ प्रतिशत, इन्डोनेसियाले ३२ प्रतिशत, मलेसियाले २४ प्रतिशत र कम्बोडियाले ४९ प्रतिशत करको सामना गर्नुपर्नेछ ।
ह्वाइट हाउसको दस्तावेजअनुसार ट्रम्पले संयुक्त राज्य अमेरिकाको सबैभन्दा ठूलो व्यापार घाटा भएका देशहरू र क्षेत्रहरूमा व्यक्तिगत पारस्परिक उच्च कर लगाउनुहुनेछ । केही सामानहरूमा पारस्परिक कर लाग्नेछैन । जसमा स्टील र आल्मुनियम साथै धारा २३२ करको अधीनमा पहिले नै अटो र अटो पाट्र्स, तामा, औषधि, अर्धचालक र काठ समावेश छन् ।(एएफपी)
