काठमाडौं । इजरायलले हालैको शान्ति सम्झौता तोडेपछि गाजापट्टीमा करिब चार लाख प्यालेस्टिनी विस्थापित भएको संयुक्त राष्ट्रसंघले बताएको छ । अनादोलु समाचार एजेन्सीका अनुसार राष्ट्रसंघीय प्रवक्ता स्टेफान दुजारिकले गाजामा इजरायली आक्रमण निरन्तर जारी रहँदा व्यापक नागरिक हताहती गराइरहेको बताउनुभयो ।
‘गाजामा धेरै बालबालिकासहित मानिसहरू मारिइरहेका छन्, घाइते भइरहेका छन् र जीवनभरका लागि अपांग बनाइँदैछन्’, उहाँले भन्नुभयो, ‘गाजाभरका बाँचेकाहरू पटक-पटक विस्थापित भइरहेका छन् र झन्झन् सानो हुँदै गएको स्थानमा धकेलिएका छन् जहाँ उनीहरूको आधारभूत आवश्यकताहरू पूरा हुन सक्दैन ।’ शान्ति सम्झौता भंग भएपछि करिब चार लाख मानिस अर्थात् गाजाको जनसंख्याको १८ प्रतिशत विस्थापित भएका छन् भन्दै दुजारिकले कब्जा गर्ने शक्तिका रूपमा इजरायलले विस्थापित जनसंख्याको सुरक्षा र जीवित रहनका लागि कुनै व्यवस्था नगरेको बताउनुभयो ।
मानवीय प्रयासहरू टुट्ने विन्दुको नजिक पुगेकोप्रति चिन्ता व्यक्त गर्दै उहाँले आवश्यक वस्तु र आपूर्तिको वितरणका लागि क्रसिङहरू तुरुन्त फेरि खोल्न आग्रह गर्नुभयो । साथै मानवीय सामग्री भिœयाउने प्रयास अवरुद्ध भएको र सहयोग आवागमन समन्वय गर्ने अधिकांश प्रयास रोकिएको पनि उहाँले बताउनुभयो ।
इजरायली सेनाले आकस्मिक चिकित्सकहरूको हत्या विषयलाई सम्बोधन गर्दै दुजारिकले राष्ट्रसंघीय महासचिव एन्टोनियो गुटेरेस विचलित गर्ने भिडियो फुटेजका बारेमा जानकार रहनुभएको र घटनाको स्वतन्त्र र पारदर्शी अनुसन्धानका लागि आहृवान गरिरहनुभएको पुष्टि गर्नुभयो । जारी मानवीय संकटका सम्बन्धमा उहाँले एक महिनाभन्दा बढी समयदेखि कुनै पनि खोप, खाद्यान्न, इन्धन वा अन्य आपूर्तिहरू गाजामा प्रवेश नगरेको र पोलियो खोपका लागि पनि कुनै अपवाद नबनाइएको बताउनुभयो । विशेषगरी गाजाबाट प्यालेस्टिनीलाई विस्थापित गर्ने अमेरिकी राष्ट्रपति डोनाल्ड ट्रम्पको योजना कार्यान्वयन गर्ने प्रयासहरू जारी रहेको बेला इजरायली प्रधानमन्त्री बेन्जामिन नेतन्याहुले सैन्य अभियानलाई तीव्र पार्ने प्रतिज्ञा गर्नुभएको छ ।
गाजा क्षेत्रको ५० प्रतिशत भन्दा बढी भू-भाग कब्जा
इजरायलले गत महिना हमासविरुद्ध पुनः युद्ध सुरु भएपछि गाजापट्टीमा आफ्नो उपस्थितिलाई नाटकीय रूपमा विस्तार गरेको छ । हाल गाजा क्षेत्रको ५० प्रतिशत भन्दा बढी भू-भाग इजरायलको नियन्त्रणमा आएको र प्यालेस्टिनीहरूलाई सानो भू-भागमा सीमित गरिदिएको अमेरिकी समाचार संस्था एसोसिएटेड प्रेसले जनाएको छ ।
इजरायली सेनाले इजरायल र गाजा सीमानजिकैको ठूलो भूभाग नियन्त्रण गरेको बताइएको छ । यहाँ इजरायली सेनाले प्यालेस्टिनीहरूका घर, कृषि योग्य जमिन र आधारभूत संरचना नष्ट गरेका कारण यो क्षेत्र अब बस्न योग्य नरहेको बताइएको छ । साथै, सैनिक बफर जोनको आकार पनि हालका हप्ताहरूमा दोब्बर भएको छ ।
इजरायलले आफ्नो यो कदमलाई २०२३ अक्टोबर ७ मा भएको हमास आक्रमणपछि उसले बन्धक बनाएका बाँकी बन्दी छोड्न बाध्य बनाउन आवश्यक अस्थायी कदम भनेर चित्रण गरेको छ । तर, मानवअधिकार समूहहरूले यसलाई इजरायलको दीर्घकालीन रूपमा गाजा कब्जा गर्ने एक कदम भनेको छ । (एजेन्सी)
