चितवन । चितवनको मौलाकालिका अस्पतालमा एक महिलाको पेटबाट २० लिटर पानी निकालिएको छ । नवलपरासीको देवचुलीकी २७ वर्षिय एक महिलाको बाँया डिम्बाशयमा जम्मा भएको पानी आइतबार शल्यकिक्रया गरी निकालिएको हो । अस्पतालका स्त्रीरोग विशेषज्ञ डा. केशवराज भुर्तेल, डा. रमेश पौडेल, डा.प्रणीता महर्जन प्रधान लगायतको समूहले उनको शल्यक्रिया गरेको हो । शल्यक्रिया पछि उनको स्वास्थ्य अवस्था राम्रो रहेको डा.पौडेलले बताउनुभयो । पहिलो पटक यति ठूलो मात्रामा पेटबाट पानी निकालेको उहाँले बताउनुभयो । उहाँले भन्नुभयो, “यस्ता केसहरु आईरहन्छ तर यति ठूलो पहिलो पटक आएको हो ।” महिलाको डिम्बाशयमा क्यान्सर भए नभएको पत्ता लगाउन नमूना प्रयोगशाला पठाईएको डा. पौडेलले जानकारी दिनुभयो । उहाँले भन्नुभयो, “यस्तो खालको केषमा केहीमा क्यान्सर हुने खालको हुन्छ भने केहीमा हुँदैन । हामीले उनको शल्यक्रिया गर्दाको क्षणमा क्यान्सर जस्तो देखिएको छैन । तर पनि बायोप्सी गर्न पठाएका छौं ।” प्रयोगशालाको रिपोर्ट अएपछि क्यान्सर भए नभएको थाहा हुने उहाँको भनाई छ । दुई हप्तामा प्रयोगशाला रिपोर्ट आउने उहाँले बताउनुभयो । डिम्बाशयमा पानी जम्न नदिनको लागि महिलाहरुले ६–६ महिनामा परीक्षण गर्न डा. पौडेलले सुझाव दिनुभयो । उहाँले समयमा उपचार नगरी हेल्चक्राई गरेमा पानीको फोका पेटभित्र फुटेर अरु अङ्गलाई असर गर्ने बताउनुभयो । डिम्बाशयमा हुने भएकाले यसले प्रजनन् क्षमतामा असर गर्छ । ती महिलाको दायाँ डिम्बाशय स्वस्थ रहेकाले आमा बन्न चाहेको खण्डमा गर्भ रहन सक्ने डा. पौडेलको भनाई छ । डिम्बाशयमा पानी जम्न थालेपछि पेट बढ्दै जाने लक्षणहरु देखा पर्दछ । डा. पौडेलले भन्नुभयो “ठ्याक्कै गर्भअवस्था जस्तै पेट बढ्दै जान्छ । कसै–कसैमा रक्तश्राप हुन्छ । पेट बढ्दै गएपछि खानै नमिल्ने, उठ्न, बस्न, सुत्न नमिल्ने हुन्छ ।” यो समस्या महिलाहरुमा जेनेटिक, क्रोमोजम, जिन डिफेक्ट र हर्मोनको कारणले गर्दा हुने डा. पौडेलले बताउनुभयो । साथै खानपान र वातावरणले पनि यस्तो असर पार्ने उहाँको भनाइ छ । बिरामी महिलाले विगत ६ महिनादेखि आफुलाई यस्तो समस्या देखिएको बताउनुभयो । पेट बढ्दै जाँदा श्वासप्रश्वासमा समस्या आएपछि अस्पताल भर्ना भएको उनको भनाई छ ।