काठमाडौं । गत भदौ २३ र २४ गते भएको ‘जेन-जी’ प्रदर्शनका क्रममा काठमाडौंमा घाइते भएका प्रदशनकारीहरूको वर्गीकरण गरिएको छ । हालसम्म कुल १६९ जना घाइतेको विवरण प्राप्त भई वर्गीकरण गरिएको हो । जिल्ला प्रशासन कार्यालय काठमाडौंका सहायक प्रमुख जिल्ला अधिकारी एवं सहायक प्रवक्ता मुक्तिराम रिजालले यही मंसिर ५ र १२ गते दुई चरणमा छलफल गरेर घाइतेहरूको वर्गीकरण गरिएको हो ।
त्यस्तै, अशक्तहरूको हकमा भने उपचाररत अस्पतालमा गएर टोलीले वर्गीकरण गरेको र प्रशासन कार्यालयमा आउन असहज हुनेहरूको हकमा एम्बुलेन्समार्फत ल्याएर वर्गीकरण गरिएको उहाँले जानकारी दिनुभयो । प्रजिअको संयोजकत्वमा रहेको वर्गीकरण सहजीकरण समितिले ‘जेन-जी’ प्रदर्शनका क्रममा घाइते भएकाहरूको वर्गीकरणसम्बन्धी कार्यविधि, २०८२ का आधारमा हालसम्म १६९ जनाको वर्गीकरण गरेको हो ।
काठमाडौं जिल्ला प्रशासन कर्यालयले उक्त वर्गीकरण सम्पन्न गरी स्वास्थ्य तथा जनसंख्या मन्त्रालयलाई सिफारिश पठाउने र सोही आधारमा मन्त्रालयले निर्णय गरी घाइतेहरूको सूचीअनुसार आवश्यक सेवा सुविधा र सामाजिक सुरक्षाको व्यवस्था मिलाउने जानकारी दिएको छ । ‘जेन-जी’ प्रदर्शनका लागि सुरुमा प्रशासन कार्यालयले ३१५ जनालाई अनुमतिपत्र उपलब्ध गराएको थियो ।
घाइतेलाई चार समूहमा विभाजन
भदौ २३ र २४ गते काठमाडौं भएको ‘जेन-जी’ प्रदर्शनमा घाइते भएका प्रदशनकारीमध्ये हालसम्म विवरण भएका १६९ घाइतेहरूको चार समूहमा वर्गीकरण गरिएको छ । जसमध्य अति गम्भीर घाइतेको सूचीमा १५ जना रहेका छन् । त्यस्तै, गम्भीर घाइतेको सूचीमा ५१ जना रहेका छन् भने मध्यममा ३६ जना र सामान्य घाइतेको सूचीमा ६७ जना रहेका छन् ।(हिमालय टाईम्स)
