रुपन्देही । लुम्विनी प्रदेशका गृहमन्त्री सन्तोषकुमार पाण्डेयले शिक्षाको विकासले नै मुलुकको विकास सम्भव भएको बताएका छन् । उनले शिक्षाको विकास गर्न शैक्षिक पूर्वाधार तथा पढाउने शिक्षकको लगनशिलताले भूमिका खेल्ने बताए ।

रुपन्देहीको सिद्धार्थनगर-९ मा रहेको भानु माध्यमिक विद्यालयमा चारकोठे भवन निर्माणको शिलान्यास गर्दै सोमबार उनले लुम्बिनी प्रदेश सरकार शिक्षाको क्षेत्रमा लगानी गर्ने गरी अघि बढिरहेको जनाए ।

उनले उक्त विद्यालयसँग आफ्नो पारिवारिक सम्बन्धसमेत रहेकाले आफूले यसमा पूर्वाधार बनाउन ३० लाख रुपैयाँ प्रदेश सरकारमार्फत विनियोजनको प्रबन्ध मिलाएको बताए ।

विद्यार्थीहरुको पठनपाठनका लागि केही कक्षाकोठाको अभाव रहेकोले अब बन्ने भवनले सहयोग गर्ने भानु माविका प्रधानाध्यापक मोतीलाल सुवेदीले बताए । उनले चैत महिनासम्म निर्माणसम्पन्न हुने गरी सम्झौता भएको जानकारी दिए । ‘भवनको फिनिसिङलगायतका कार्यका लागि थप बजेट आवश्यक पर्छ, बजेटका लागि प्रदेश सरकारसँग माग गरेको छौं,’ सुवेदीले भने ।