काठमाडौं । छैटौँ संस्करणको जिल्लास्तरीय पाँचपोखरी ट्वान्टी–२० क्रिकेट प्रतियोगितामा पाँचपोखरी क्रिकेट क्लबले लगातार दोस्रो जित निकालेको छ ।

सोमबारको पहिलो खेलमा पाँचपोखरी क्रिकेट क्लबले माइटी साँगाचोकलाई हराउँदै ५६ रनको जित निकालेको हो । खेलमा टस जितेर ब्याटिङमा आएको पाँचपोखरीले निर्धारित २० ओभरमा ६ विकेट गुमाएर १८९ रनको योगफल खडा गरेको थियो ।

पाँच पोखरीका विवेक रानामगरले ३० रन बनाएका थिए । लाक्पा लामाले ३५ रन, आर्यन धितालले ३२ रन जोड्दा कप्तान सार्थक धितालले २८ रनको योगदान दिएका थिए ।

१९० रनको लक्ष्यसहित मैदान उत्रिएको माइटी साँगाचोकले निर्धारित २० ओभरमा सात विकेट गुमाएर १३३ रनमात्र बनाउन सक्यो ।

माइटीका लागि नवराज थापाले उत्कृष्ट ब्याटिङ गर्दै ५८ रन बनाए पनि टिमको हार टार्न सकेनन् । मिलन थापाले ३३ रन जोड्दा अन्य ब्याटरहरूले भने उल्लेख्य योगदान गर्न सकेनन् ।

सोमबारै भएको दोस्रो खेलमा भोटेचौर स्पोर्ट्स क्लबले साँगाचोकगढी नगरपालिकालाई ४१ रनले हरायो । टस जितेर ब्याटिङ गरेको भोटेचौर स्पोर्ट्स क्लबले २० ओभर खेल्दै ८६ रनको योगफल तयार पारेको थियो ।

भोटेचौरका राजीव चौलागाईंले १७ रन बनाएका थिए । अभिषेक चौलागाईले १४ र कुशल चौलागाईंले १३ रनको योगदान दिए ।

८७ रनको लक्ष्य पछ्याउने क्रममा साँगाचोकगढी नगरपालिका १०.४ ओभरमा अलआउट हुँदै ४५ रन मात्र बनाउन सक्यो ।

भोटेचौरबाट सरिन कार्कीले चार विकेट लिए । प्लेयर अफ दी म्याच चुनिएका सरिनले तीन ओभरमा जम्मा चार रन मात्र खर्चेर महत्त्वपूर्ण चार विकेट लिएका थिए ।

लगातार दोस्रो हार बेहोरेको साँगाचोकगढी नगरपालिका प्रतियोगिताबाटै बाहिरिने पहिलो टिम बनेको छ ।

छैटौँ संस्करणको पाँचपोखरी ट्वान्टी–२० क्रिकेट प्रतियोगितामा सिन्धुपाल्चोक जिल्लाका आठ टोलीको सहभागिता छ । प्रतियोगिताको विजेताले एक लाख र उपविजेताले ५० हजार रुपैयाँ प्राप्त गर्नेछन् ।