हिन्दु धर्मशास्त्र अनुसार साताको केही बारलाई कपाल काट्न वा नङ, दाह्री काट्न बन्देज लगाइएको छ । तर कुनै बारलाई अत्यन्तै शुभ मानिएको छ ।
बुढापाकाले आज यो बार कपाल काट्नु हुँदैन, आज जन्म बार कपाल काट्नु हुँदैन भनेको त प्रायः धेरैले सुनेका छौँ । तर पछिल्लो पुस्ताले यसलाई वेवास्ता गर्ने गरेको पाइन्छ । आज हामी यसैका बारेमा चर्चा गर्नेछौँ ।
साताको पहिलो बार अर्थात् आइतबारलाई सूर्यको बार मानिन्छ । यो दिन भगवान् सूर्यको पूजा गर्ने र व्रत पनि बस्ने गरिन्छ ।
आइतबार कपाल काट्दा धर्म, धन र बुद्धिको नाश हुने महाभारतको अनुशासन पर्वमा उल्लेख गरिएको छ ।
त्यसै गरी सोमबार पनि कपाल काट्नु राम्रो मानिँदैन । यस दिन कपाल काट्दा मानसिक दुर्बलता हुने र सन्तानलाई हानी गर्नुका साथै असामयिक मृत्यु समेत गराउन सक्ने धार्मिक शास्त्रमा उल्लेख छ ।
ज्योतिष शास्त्रका अनुसार मंगलबार मङ्गलको दिन हो । यो दिन कपाल काट्दा अशुभ प्रभाव पर्छ । आयुलाई हानी गराउन सक्ने मान्यता रहेको छ ।
बुधबार कपाल काट्नु निकै राम्रो मानिएको छ । यो दिन कपाल काट्दा धन आउने र परिवारका सदस्यमा खुसी आउने महाभारतको अनुशासन पर्वमा उल्लेख गरिएको छ ।
बिहीबार धन नास हुने मानिन्छ र मान सम्मानमा समेत ठेस पुग्ने धार्मिक विश्वास रहेको छ ।
शुक्रबार कपाल काट्नु राम्रो मानिन्छ । शुक्रबारलाई सौन्दर्यको दिन मानिन्छ ।
शनिबार कपाल काट्नुलाई असाध्यै अशुभ मानिएको छ । यसले मृत्युको भय बढ्ने मानिन्छ ।
