काठमाडौं । वेस्ट इन्डिज र अमेरिकामा जारी टी(२०)विश्वकपको १९ औं खेलमा भारतले पाकिस्तानलाई पराजित गरेको छ।
अमेरिकाको न्युयोर्कमा भएको आइतबार राति भएको खेलमा भारत ६ रनले विजयी भएको हो।
भारतले दिएको १२० रनको लक्ष्य पछ्याएको पाकिस्तानले निर्धारित २० ओभरमा ७ विकेट गुमाएर ११३ रन मात्र बनायो।
पाकिस्तानका लागि मोहम्मद रिजवानले ३१ तथा इमाद वासिमले १५ रन बनाए। भारतका लागि जसप्रित बुमराहले तीन तथा हार्दिक पान्ड्याले दुई विकेट लिए ।
त्यसअघि टस हारेर पहिले ब्याटिङ गरेको भारतले १९औं ओभरको अन्तिम बलमा अल आउट हुम्दै ११९ रन बनाएको थियो।
भारतका लागि रिषभ पन्तले ३१ बलमा ६ चौकाको सहयोगमा सर्वाधिक ४२ रन बनाए। अक्षर पटेलले १८ बलमा २० तथा कप्तान रोहित शर्माले १२ बलमा १३ रन बनाए। भारतका अन्य ब्याटरले दोहोरो अंकमा रन बनाउन सकेनन्।
पाकिस्तानका लागि हरिस रउफ र नशिम शाहले समान तीन तीन तथा मोहम्मद आमिरले दुई विकेट लिए।
लगातार दोस्रो हारका साथ पाकिस्तानको सुपर आठमा पुग्ने सम्भावना कठिन बनेको छ। पाकिस्तान पहिलो खेलमा अमेरिकासँग पराजित भएको थियो। दुई खेलमा लगातार जित हात पारेको भारत चार अंकका साथ शीर्ष स्थानमा उक्लिएको छ।
