काठमाडौं । कैलाली जिल्लाको धनगढी उपमहानगरपालिका–१६ रामपुरमा रहेको छ, चर्चीत अनि धार्मीक स्थल बेहडाबाबा मन्दिर । उक्त मन्दिरमा गङ्गादशहरा पर्वका अवसरमा मेला लाग्ने गरेको छ । सो मेला हिजोबाट सुरु भएको छ ।

बेहडाबाबा मन्दिर व्यवस्थापन समितिका अनुसार धार्मिक महत्व बोकेको उक्त मन्दिरमा पूजाआजाका लागि विभिन्न स्थानबाट दर्शनार्थीको भीडभाड बढेको छ ।

गङ्गाशहरा मेलाको दर्शन तथा पूजाआजाका लागि यहाँका स्थानीय मात्र नभई छिमेकी मुलक भारतबाट लाखौँको सङ्ख्यामा भक्तजन तथा दर्शनार्थीहरू यहाँ आएका अध्यक्ष जोशीले बताए ।

बेहडाबाबा मन्दिरको दर्शनले मनमा शान्ति एवम् इच्छाएको कुरा पुग्ने जनआस्थाअनुसार यहाँ प्रत्येक वर्ष भारतको लख्खीमपुर, पलिया, पिलीभित, उत्तराखण्डलगायतका विभिन्न क्षेत्रबाट भक्तजन आउने गरेका छन् ।

मेलादर्शन तथा पूजाका लागि आउने भक्तजनका लागि मन्दिरका चारै ढोका खुला गरिएका छन् । भक्तजनहरुका लागि महाभण्डारा चलाइनुका साथै निःशुल्क खाना र पानीको व्यवस्थापन गरिएको आयोजकले जनाएको छ । मेला भर्न १० देखि १५ लाखको दर्शनार्थी यहाँ आउने आयोजकको अनुमान छ ।