काठमाडौँ । कपाल सिल्की र साइनिङ बनाउन पछिल्लो समय कपाल स्ट्रेट गर्ने, केराटिन गर्ने लगायत विभिन्न केमिकलहरुको प्रयोग हुँदै आएको पाइन्छ । तर बजारका यस्ता प्रडक्टहरु कपालमा प्रयोग गर्दा यसले निकै हानी गर्ने चिकित्सकहरु बताउँछन् ।
आफ्नो टाउकोमा लहराइरहेको सुन्दर कपाल बनाउनु धेरैको चाहना हुन्छ । यसका लागि धेरैले विभिन्न केमिकल ट्रिटमेन्ट गर्छन् । त्यस्तै हिजोआज सुन्दर कपाल पाउन भन्दै केराटिनको ट्रिटमेन्ट गर्ने चलन एकदमै बढिरहेको छ ।
घुमेको कपालबाट छुट्कारा र रेशमी सीधा कपाल बनाउन महिलाहरु केराटिन ट्रिटमेन्टमा आकर्षित भइरहेका छन् । केराटिनमा आधारित हेयर स्ट्रेनिङ उत्पादनमा ग्लाइआक्सिलिक एसिड पाइन्छ । यसले मिर्गौलामा जोखिम बढ्ने पाइएको छ ।
केराटिनले आँखामा जलन हुने, टाउको दुख्ने, छाती दुख्ने, बान्ता आउने, खोकी लाग्ने, घाँटी दुख्ने, नाकबाट रगत आउने, श्वासप्रश्वासमा समस्या आउन सक्छ । साथै यसले केराटिन गर्नेलाई मात्र नभई केराटिन गराउने ब्युटिसियनलाई पनि छालासम्बन्धी समस्या, टाउको दुख्ने, आँखा चिसो हुनेजस्ता समस्या हुने छालारोग विशेषज्ञहरु बताउँछन् ।
केराटिन क्रिममा हुने फार्मल्डहाइड छालाको माध्यमबाट शरीरमा प्रवेश गरेमा नसासम्बन्धी रोग हुन सक्ने जोखिम हुनछ । त्यस्तै गर्भवती महिलाले केराटिन गरेमा गर्भपात हुन सक्ने तथा प्रजनन् स्वास्थ्यमा समस्या देखिने जोखिम हुन सक्छ । त्यसैगरी, अनुसन्धानअनुसार यसले भविष्यमा क्यान्सर समेत हुने जोखिम बढाउँछ । (जोय नेपाल)
