काठमाडौं । नेपाली कांग्रेसका पूर्वउपभापति तथा पूर्वमन्त्री चीरञ्जीवी वाग्लेका छोरा देवेन्द्र वाग्लेको हिजो निधन भएको छ । उनी विगत लामो समयदेखी नेपाली पर्यटन व्यवसायसंग आवद्द थिए ।

गोरखाबाट कांग्रेस महाधिवेशन प्रतिनिधिसमेत रहेका वाग्लेको काठमाडौं ह्याम्स अस्पतालमा उपचार क्रममा आइतबार निधन भएको हो । ५५ वर्षीय वाग्लेको निधनमा पर्यटन व्यवसायी तथा कांग्रेस नेता–कार्यकर्ताले दुःख व्यक्त गरेका छन् ।

एडभेन्चर माउन्टेन एक्स्प्लोर ट्रेक्स एन्ड एक्स्पिडिसन (एमिको) का सञ्चालक वाग्लेले इमानदार पर्यटन व्यवसायीको छवि बनाएका थिए ।

यस्तै ५५ वर्षीय वाग्लेको निधनमा नेपाली कांग्रेसले शोक वक्तव्य जारी गरेको छ । शोक वक्तव्यमा भनिएको छ, “नेपाली कांग्रेस गोरखा क्षेत्र नं. १ का महाधिवेशन प्रतिनिधि एवं पर्यटन व्यवसायी देवेन्द्र वाग्लेको कात्र्तिक २५ गते राजधानीको ह्याम्स अस्पतालमा उपचारका क्रममा निधन भयो । स्वर्गीय वाग्लेले नेपाली कांग्रेसको संगठन निर्माण र नेपालको लोकतान्त्रिक आन्दोलनहरुमा सक्रिय भूमिका निर्वाह गर्नु भएको थियो । उहाँ नेपाली कांग्रेसका नेता एवं पूर्व मन्त्री चिरञ्जीवी वाग्लेका सुपुत्र हुनुहुन्छ । उहाँको निधनबाट नेपाली कांग्रेसले एक होनाहार युवा नेतृत्वलाई गुमाएको छ ।

उहाँको निधनप्रति नेपाली कांग्रेसका सभापति एवं पूर्व प्रधानमन्त्री शेरबहादुर देउवाले गहिरो दुःख व्यक्त गर्नु भएको छ । उहाँप्रति भावपूर्ण श्रद्धाञ्जली अर्पण गर्दै आत्माको चीर शान्तिको कामना साथ शोक सन्तप्त परिवारजनप्रति पार्टी र आफ्नो तर्फबाट गहिरो समवेदना प्रकट गर्नु भएको छ” ।

वाग्लेको निधनबारे ट्रेकिङ एजेन्सिज एसोसिएसन अफ नेपाल (टान) अध्यक्ष सागर पाण्डेले नेपालको पर्यटन क्षेत्रले एक कुशल व्यावसायिक नेता गुमाएको बताएका छन् ।

यस्तै, ठमेल पर्यटन बिकास परिषदको सदस्य, महिला उद्धमी एवं समाजसेवी कोपिला सिंखडाले अकल्पनीय घटना प्रती दुख व्यक्त गर्दै, समग्र पर्यटन व्यवसायीले एक असल अभिभावक गुमाएको बताउनु भयो ।

वाग्नलेकाे आजै पशुपती आर्यघाटमा अन्त्यष्टी गरिएकाे छ ।