काठमाडौं । रुसी राष्ट्रपति भ्लादिमिर पुटिनले इस्टर पर्वको अवसरमा युक्रेन युद्धमा अस्थायी युद्धविराम घोषणा गरेका छन्।

क्रेमलिनको टेलिग्राम च्यानलमार्फत जारी वक्तव्य अनुसार पुटिनले शनिबार साँझ ६ बजेदेखि आइतबार मध्यरातसम्म सबै प्रकारका सैन्य कारबाही रोक्ने निर्णय गरेका हुन्।

पुटिनले युक्रेनी पक्षलाई पनि सोहीअनुसार कदम चाल्न आग्रह गर्दै युद्धविराम उल्लंघन भएमा कडा जवाफ दिने चेतावनी दिएका छन्। उनले एक भिडियो सन्देशमार्फत भने, “यदि उक्साउने कार्य वा युद्धविरामको उल्लंघन भयो भने रुसी सैनिक जवाफी कारबाहीका लागि पूर्णरूपमा तयार छन्।”

रुसी रक्षा मन्त्रालयले पनि एक औपचारिक बयान जारी गर्दै अस्थायी रूपमा सैन्य अभियान रोक्ने निर्णयको पुष्टि गरेको छ।

यस निर्णयमा युक्रेनी सरकार वा सैन्य निकायको आधिकारिक प्रतिक्रिया भने आइसकेको छैन।(एजेन्सी)