चरिकोट : नेकपा एमाले दोलखा वागमती प्रदेश सभाका प्रदेश २ का उम्मेदवार भरतबहादुर केसीले एमाले काम गरेर देखाउने पार्टी भएको हुँदा अरुको कुरा काट्न फुर्सद नभएको बताउनुभएको छ।
भीमेश्वर नगरपालिकाको वडा न ५ द्वारा आयोजित दीपावलीको अवसरमा शुभकामना आदानप्रदान कार्यक्रमलाई सम्बोधन गर्दै केसीले एमाले अर्काको बारेमा खिसीट्युरी नगरी काम गरेर देखाउने पार्टी भएको हुँदा मंसिर ४ को चुनावमा एमालेलाई सूर्य चिह्नमा मतदान गर्न आग्रह गर्नुभयो ।
केसीले स्थानीयहरुसँग अन्तरसंवाद गर्दै गाउँमा रहेको खानेपानी तथा सिँचाइको समस्या समाधान गर्न आफूले विगतदेखि नै पहल गरेको बताउनुभयो । मलाई जिताउनुभयो भने घरघरमा खानेपानी योजनाका साथै लिफ्टिङ सिँचाइ लगायत थप अन्य योजनाहरु मेरो कार्यकालमा सम्पन्न हुनेछ । घरदैलोका क्रममा उहाँले भन्नुभयो ।
कार्यक्रममा नेकपा एमाले प्रदेशसभा सदस्य डबल पाण्डेले दीपावलीको शुभकामना दिँदै एमाले उम्मेदवार भरत केसी जे गर्छन्, त्यो मात्र बोल्ने गरेको बताउनुभयो । उहाँले अब आफूले भोट आफैँ मात्रै हाल्ने नभएर आफन्त, भाइ, भतिज, सबैमा एमालेलाई मत खसाल्न अनुरोध गर्दै एमालेलाई भारी मतले जिताउन आग्रह गर्नुभयो ।
कार्यक्रममा नेकपा एमालेका वागमती प्रदेश कमिटी, जिल्ला कमिटी, नगर कमिटी तथा गाउँ कमिटीमा आवद्ध नेता कार्यकर्ताहरूको उपस्थिति रहेको थियो ।
