चितवन । नेकपा माओवादी केन्द्र चितवनका जिल्ला सहइन्चार्ज रमेश रेग्मी एमाले प्रवेश गरेका छन् । चितवन माओवादी अध्यक्ष पुष्पकमल दाहाल ‘प्रचण्ड’ को गृहजिल्ला हो ।

एमाले अध्यक्ष केपी शर्मा ओलीको निवास बालकोटमा रेग्मीसहित माओवादीनिकटको प्रेस सेन्टरका केन्द्रीय सचिव प्रल्हाद पोखरेल पनि एमाले प्रवेश गरेको एमाले वागमती प्रदेश कमिटी सचिव विजय सुवेदीले जानकारी दिए । यसअघि माओवादीकै जिल्ला इन्चार्ज तथा केन्द्रीय सदस्य यमबहादुर परियार एमाले प्रवेश गरेका थिए । परियार र रेग्मीको प्रवेशसँगै माओवादी केन्द्र चितवन जिल्ला इन्चार्ज र सहइन्चार्जविहीन भएको छ ।

एमाले प्रवेश गरेका रेग्मी माओवादी वागमती प्रदेश कमिटीको सचिवालय सदस्यसमेत हुन् । पत्रकार नेता पोखरेल पनि वागमती प्रदेश कमिटीका सदस्य हुन् । रेग्मीले यसअघि माओवादी केन्द्र चितवनको पटकपटक जिल्ला सचिव, काठमाडौं र ललितपुरको समेत पार्टी सचिव भएर काम गरेका थिए । माओवादी केन्द्र ‘दाहाल एण्ड कम्पनी’ को रूपमा विकास भएकोले त्यहाँ बस्दा नेपाली कम्युनिष्ट आन्दोलनलाई थप क्षति र बर्बादी हुने भन्दै रेग्मीले आफूहरू कम्युनिष्ट आन्दोलनका मूल धार एमालेमा समाहित भएको बताए ।

पार्टीलाई सही बाटोमा ल्याउन अन्तरसंघर्ष गरेपनि प्रचण्डले जे भन्छन् त्यही नियम र कानून बन्ने गरेको र व्यक्तिवाद हाबी भएको उनको आरोप छ ।

‘कांग्रेससँग आत्मसमर्पण गर्दै माओवादी अहिले कांग्रेसले छुट्याएको भाग खाने ठाउँमा आइपुगेको छ । कांग्रेसलाई ठूलो पार्टी बनाउन हिँड्ने कदापि कम्युनिष्ट हुन नसक्ने ठहरसहित हामी एमालेमा आएका हौं । अरु कम्युनिष्टहरू पनि एमालेमा केन्द्रीकृत हुन आवश्यक छ । अरू पनि नेता-कार्यकर्ता एमालेमा आउन उचित समयको पर्खाइमा छन्’, एमाले प्रवेशको क्रममा रेग्मीले भने ।

पार्टी प्रवेश गर्ने कार्यक्रममा माओवादीबाट एमाले प्रवेश गरेका केन्द्रीय सदस्य यमबहादुर परियारलगायतको उपस्थिति थियो ।