दोलखा ।
नेकपा एमालेका तर्फबाट प्रतिनिधिसभा सदस्य उम्मेदवार बालकृष्ण शिवाकोटीले दोलखाको उत्तरी मुकाम सिङ्गटीदेखि उत्तरका सबै ग्रामीण सडक कालोपत्र गर्ने अभियान चलाइने बताउनुभएको छ ।
घरदैलो तथा मतदाता भेटघाट कार्यक्रमका क्रममा शनिबार जिल्लाको विगु गाउँपालिका–६ आलम्पु पुग्नुभएका उम्मेदवार शिवाकोटीले नेकपा एमालेको नेतृत्वमा बनाइएका सबै कच्ची सडकहरूलाई पक्की बनाउने अभियान नै सञ्चालन गरिने बताउनुभएको हो ।
मंसिर ४ गते हुने निर्वाचनमा एमालेका उम्मेदवारहरूले जित हासिल गर्दा जिल्लामा विकासको रफ्तार बढ्ने उहाँको भनाइ छ ।
‘एमालेका उम्मेदवारहरूले जित हासिल गर्दा केन्द्र र प्रदेशमा एमालेको नेतृत्वमा सरकार बन्छ । एमालेको सरकार बन्यो भने मात्रै दोलखाको विकास निर्माणका कामलाई पूर्णता दिन र नयाँ कामको थालनी गर्न सकिन्छ,’ उम्मेदवार शिवाकोटीले भन्नुभयो, ‘एमालेले केन्द्रदेखि वडासम्मै ‘सुखी नेपाली समृद्ध नेपाल’ अभियान सुरू गरिसकेको छ । यो विकास र समृद्धिको अभियान हो, यसलाई अगाडि बढाउन तपाइँहरूको साथको खाँचो हामीलाई छ ।’
उम्मेदवार शिवाकोटीले अगाडि भन्नुभयो, ‘दोलखादेखि सिंगटीसम्म सडकको ट्रयाक खोल्ने काम तत्कालीन सांसद आनन्द पोखरेलको पालामा भएको हो । त्यस्तै सिंगटीदेखि विगु गाउँपालिकाका विभिन्न वडाहरूसम्म जोडिएका सडक सञ्जाल निर्माणमा पनि एमालेकै नेता र सांसदहरूको भूमिका छ । यसको स्तरोन्नति, ग्राभेल र कालोपत्रका लागि पनि तपाइँहरूले यो पटक सूर्यमै भोट हाल्नुपर्नेछ, हामी अभियानकै रूपमा योग्य सडकमा कालोपत्रको काम अगाडि बढाउँछौँ ।’
सुनखानी–साङ्बा चक्रपथ बनाउने, सोरुङखोलाबाट खोपाचागु तर्ने पक्की पुल बनाउने, गाउँ–गाउँमा केन्द्रीय प्रसारणको विद्युत् पुर्याउने उनेलगायत कामहरूको नेतृत्व अहिलेसम्म एमालेकै सांसदहरूले गरिरहेको उहाँको भनाई थियो । अझ धेरै कामहरूलाई पूर्णता दिन बाँकी रहेकाले दोलखामा एमालेकै नेतृत्व आवश्यक रहेकोमा पनि उहाँले जोड दिनुभयो ।
