काठमाडौं । शिक्षकका प्रतिनिधि संघ संगठनका नेताहरुले नेपालको शैक्षिक सुधार गर्ने साझा प्रतिबद्धता ब्यक्त गरेका छन् । आज काठमाडौंमा आयोजना गरिएको एक शैक्षिक अन्तक्रियामा शिक्षक नेताहरुले साझा धारणा राख्दै प्रतिबद्धता समेत राखेका हुन् ।
नेपाल शिक्षक संघ, नेपाल राष्ट्रिय शिक्षक संगठन र संस्थागत विद्यालय शिक्षक युनियनको संयुक्त आयोजनामा सम्पन्न अन्तक्रिया ‘एजुकेशन इन्टरनेशनल एसिया प्यासिफिक रिजन’को सहयोगमा सञ्चालन गरिएको थियो ।
कार्यक्रममा नेपाल शिक्षक संघका अध्यक्ष राजेन्द्रराज पौडेलले देशमा जुनसुकै विचारको नेतृत्व गर्ने सरकार आएपनि आफूहरु सधैँ विद्यार्थी, विद्यालय र शिक्षकका अधिकारका पक्षमा लडीरहने धारणा ब्यक्त गरे ।
नेपाल राष्ट्रिय शिक्षक संगठनका अध्यक्ष विष्णुप्रसाद भण्डारीले देशका सबै स्थानीय तहहरुसँग हातेमालो गरेर शिक्षाका साझा सवाललाई सम्बोधन गर्न आफूहरु लागि पर्ने बताए ।
कार्यक्रममा संस्थागत विद्यालय शिक्षक युनियनका अध्यक्ष होमकुमार थापा, एजुकेशन इन्टरनेशनलका प्रतिनिधि आनन्द सिंह र सहभागी पत्रकारहरुले आ आफ्नो धारणा राखेका थिए ।
कार्यक्रममा आगामी दिनमा एजुकेशन इन्टरनेशनल परियोजनामार्फत सार्वजनिक शिक्षा प्रणाली सुधारका लागि शिक्षकहरुलाई तालिम तथा अन्य क्षमता विकासका कार्यक्रमहरु सञ्चालन गरिने, शिक्षकका विशेषज्ञतालाई कदर गर्ने वातावरण तयार गर्ने, शिक्षा ऐन जारी गर्न दवाव दिने जस्ता कार्यक्रमहरु अघि सारिने जानकारी गराइएको थियो ।
देशको शिक्षामा सुधार ल्याउन र सबै सरोकारवाला निकायलाई जानकारी तथा सचेत गराउन पत्रकार र सञ्चार क्षेत्रलाई पनि शिक्षा अभियानमा सँगसँगै लैजाने जानकारी गराइएको थियो ।
