ललितपुर । ललितपुरमा एक जना मिटरब्याजी पक्राउ परेका छन् । ललितपुर महानगरपालिका- १४ नखिपोट बस्ने ४६ वर्षीय ज्ञानेन्द्र महर्जनलाई पक्राउ गरेको जिल्ला प्रहरी परिसर ललितपुरका प्रमुख एसएसपी सिद्धिविक्रम शाहले जानकारी दिनुभयो ।
उनका अनुसार ज्ञानेन्द्रले २०७५ पुस २४ गते ललितपुर(११ बस्ने ३७ वर्षीय मनोज महर्जनलाई ३० लाख रुपैयाँ दिएका थिए । सापटी रकम फिर्ता लिँदा भने उनले एक करोड २६ लाख रुपैयाँ सावा भन्दा बढी लिएर ‘अनुचित लेनदेन गर्न नहुने कसुर’ गरेको प्रहरीले जनाएको छ ।
उनको घरमा ७ करोड २९ हजार ७७ हजार बराबरको विभिन्न व्यक्तिहरूको नामको तमसुक २३ वटा, एक करोड ३४ लाख रुपैयाँ बराबरको ३२ वटा चेक, ६ वटा चेकबुक र लालपुर्जा समेत बरामद भएको थियो ।
त्यसरी अनुचित लाभ लिएको भन्ने उजुरी परेपछि परिसरले उनलाई ललितपुर-१४ जुपिटरटोलस्थित घरबाट पक्राउ गरेको थियो । उनको घरमा प्रहरीले तलासी लिँदा ७ करोड २९ हजार ७७ हजार बराबरको विभिन्न व्यक्तिहरूको नामको तमसुक २३ वटा बरामद भएको थियो ।
ती तमसुक कतिपय वडाबाट प्रमाणित भएका, केही नभएका र केही म्याद नाघेका थिए । त्यस्तै विभिन्न बैंक तथा सहकारी समेतको एक करोड ३४ लाख रुपैयाँ बराबरको ३२ वटा चेक, ६ वटा चेकबुक र लालपुर्जा समेत उनको घरबाट बरामद भएको ललितपुर प्रहरी परिसरका प्रमुख एसएसपी सिद्धिविक्रम शाहले जानकारी दिनुभयो ।
उनीमाथि थप अनुसन्धान गर्न प्रहरीले ललितपुर जिल्ला अदालतबाट म्याद थपेर अनुसन्धान अघि बढाएको छ
