काठमाडौँ । वि. सं. २०३२ सालमा स्थापना भएको, समुन्द्र सतहबाट झण्डै तिन हजार मिटर उचाईमा रहेको छ, पहाडकी रानी रारा । अन्दाजी, एक सय सतसठ्ठी मिटर गहिरो, लम्बाई ५.१ किमी र चौडाई २.७ किमी रहेको सुन्दर ताल रारा, दशैँ सकिएलगत्तै घुम्न जाने नेपालीहरूको संख्या ह्वात्तै बढेको छ । त्यसो त पर्यटकिय मौंसमले पनि होला, प्रायः सबैजसो पर्यटकीय गन्तव्यहरू यतिबेला स्वदेशी पर्यटकले भरिभराउ छन् ।

हालैका दिनमा मुगु जिल्लामा रहेको ऋतु अनुसार रुप र समय अनुसार रंग फेर्ने रारा तालमा पर्यटकको संख्या बढेसँगै बुकिङ गरेर मात्र जान व्यवसायीहरूले अनुरोध गरेका छन् ।

पर्यटकीय सिजन र चाडपर्व चलिरहेकाले बिदाका समयमा रारा घुम्ने पर्यटकको संख्या ह्वात्तै बढेपछि व्यवसायीहरूले यस्तो आग्रह गरेका हुन् ।

कर्णाली पर्यटन उद्यमी समाजकाअनुसार रारामा हाल दुई सय जना बस्न मिल्ने क्षमताका रेष्टुरेन्ट छन् । क्षमताभन्दा बढी पर्यटक पुगेपछि व्यवस्थापनमा समेत समस्या भइरहेको बताइएको छ ।

रारा इको रिसोर्टका सञ्चालक समेत रहेका रोकायाका अनुसार अहिले रारा घुम्न दैनिक सात सयभन्दा बढी आन्तरिक पर्यटकहरू पुग्ने गरेका छन् ।