काठमाडौं । ओखलढुंगाको मानेभन्ज्याङ–६ सोक्माटार ब्आलेमबगर दूधकोसी किनारमा जारी नवौं संस्करण व्याकुल माइला गोल्डकप फुटबलको सेमिफाइनल समीरकण पूरा भएको छ ।
छैटौं दिन बिहीबार क्वाटरफाइनलमा खोटाङको हलेसी तुवाचुङ नगरपालिका–१ टिमले सोही वडाको जनजागरण युवा क्लबलाई २–१ ले पराजित गर्दै अन्तिम चरणमा स्थान पक्का गरेको हो ।
रिभोरुङ युवा क्लब माथिल्लो रिचुवाले ओखलढुंगा मितेरी युवा क्लब ‘बी’लाई १–० ले र मितेरी युवा क्लब ‘ए’ ले नव सगरमाथा युवा क्लबलाई ३–० ले पराजित गर्दै सेमिफाइनल पक्का गरेका थिए । बुधबार सम्पन्न क्वाटरफाइनलमा मानेभन्ज्याङ–६ को दूधकौशिका आधारभूत विद्यालय सोक्माटारले जिल्ला प्रहरी कार्यालय ओखलढुंगालाई २–० ले हराएको थियो ।
व्याकुल माइला गोल्डकप नवौं संस्करण मूल आयोजक समितिका सचिव नवीनकुमार राईका अनुसार शुक्रबार सेमिफाइनलमा हलेसी तुवाचुङ र मितेरी युवा तथा दूधकौशिका आधारभूत र रिभोरुङ युवा क्लबबीच प्रतिस्पर्धा हुनेछ ।
‘खेलकुदको माध्यमबाट विकासको अभियान’ भन्ने नारासहित २०६८ सालदेखि राष्ट्रगानका रचयिता व्याकुल माइलाको जन्मथलोमा गोल्डकप सुरु भएको हो । मानेभन्ज्याङ गाउँपालिकाको आर्थिक सहयोगमा भइरहेको स्पर्धाको नवौं संस्करणमा २३ टिम प्रतिस्पर्धामा छन् ।
प्रदेश–१ का सांसद प्रदीपकुमार सुनुवारले कात्तिक ११ गते नवौं संस्करणको उद्घाटन गरेका थिए । उद्घाटन सत्रमा राष्ट्रगानका रचयिता व्याकुल माइला, मानेभन्ज्याङ गाउँपालिकाका अध्यक्ष ज्ञानेन्द्र रुम्दाली, उपाध्यक्ष आश्रचन राई, पालिकाका पूर्वउपाध्यक्ष सबिता राईलगायतले शुभकामना व्यक्त गरेका थिए । शनिबार समापन हुने मूलआयोजक समितिका संयोजक क्षमाराज राईले जनाएका छन् ।
