बुटवल । रुपन्देही जिल्लाको सैनामैना नगरपालिका स्थित मुर्गियामा आज बुधवार देखि छैटौँ राष्ट्रिय सैनामैना कृषि, पर्यटन, औद्योगिक तथा प्रविधि, व्यापार महोत्सव २०८० सुरु भएको छ। सैनामैना उद्योग वाणिज्य सङ्घको आयोजनामा सैनामैना नगरपालिका–३ मुर्गियाको पुरानो हाटबजार तथा दुर्गामन्दिर परिसरमा हुने महोत्सव मङ्सिर १७ गतेसम्म सञ्चालन हुने छ ।

महोत्सवका अवसरमा सैनामैनाभित्र रहेका पर्यटकीय स्थलहरूको प्रचार प्रसार, पर्यटकीय स्थलहरूको फोटो प्रदर्शनी, सैनामैनाको पर्यटकीय सम्भावनाबारे गोष्ठी तथा अन्तरक्रिया लगायतका कार्यक्रम आयोजना गरिने भएको छ ।

महोत्सवको आकर्षणको रूपमा हरेक दिन सांस्कृतिक कार्यक्रम, राष्ट्रिय तथा स्थानीय कलाकारहरूको प्रस्तुति, नगरस्तरीय विद्यालय लोक नृत्य प्रतियोगिता, डान्सिङ आइडल, मम्मी डान्स प्रतियोगिता पनि रहनेछन् ।

यसैगरी, भजन प्रतियोगितासँगै लोकदोहोरी र र्‍याप गीत प्रतियोगिता पनि महोत्सवको आकर्षणका रुपमा रहने छन् ।

महोत्सवबाट सैनामैना पुरातात्त्विक क्षेत्रको ऐतिहासिक स्थल पनि भएकाले महोत्सवबाट उद्योग व्यापारको प्रवर्द्धन, धार्मिक एवम् सांस्कृतिक क्षेत्रको संरक्षण र लोक संस्कृतिको जगेर्ना गर्न सहयोग पुग्ने विश्वास गरिएको छ।

साढेतीन लाख बढी पर्यटकले मेलाको अवलोकन गर्ने तथा पाचकरोड बढीको कारोबार हुने मेला आयोजकको दावी रहेको छ

महोत्सवमा सर्वसाधारणका लागि ८० रुपियाँ र विद्यार्थीहरूका लागि ५० रुपियाँ टिकट शुल्क तोकिएको छ । ज्येष्ठ नागरिक तथा अपाङ्गता भएका, असहायका लागि भने निःशुल्क प्रवेशको व्यवस्था गरिएको छ ।

महोत्सवले सैनामैनासँगै यस क्षेत्रको उद्योग व्यापार र लोकसंस्कृति संरक्षण तथा प्रवर्द्धनमा टेवा पुग्ने आयोजकले जनाएका छन् ।