नुवाकोट । नेपालीहरुको बिशेष चाडको रुपमा रहेको माघे संक्रान्ति देशका बिभिन्न ठाउमा भिन्न-भिन्न कार्यक्रम गरि मनाईन्छ । यस पर्वको अवसरमा आज नुवाकोट लगायत देशका  विभिन्न स्थानहरूमा गोरु जुधाई मेला हुँदैछ । यसपाली जिल्लाको बिभिन्न भागबाट र छिमेकी जिल्ला समेत गरेर १८ वटा गोरु जुधाउने कार्यक्रम रहेको संयोजक गणेश श्रेष्ठले बताउनु भयो ।  नुवाकोटको तारुकालगायत विभिन्न स्थानमा १८ वटा गोरु जुध्ने छन् र विजेताहरुलाई प्रथम र द्वितिय १५०००, १३००० रुपैयाँसम्म नगद पुरस्कार राखिएको छ।

गोरु जुधाई मेलाको लागि गोरु दर्ता गराउने काम सकिएसँगै हल गोरु ठूला जुरो बनाउँदै मैदानमा उत्रिएका छन् । सोमवार नुवाकोटको तारुका (तारकेश्वर गाउँपालिका), बेत्रावती (विदुर नगरपालिका), पञ्चकन्या, लिखु, तादी गाउँपालिकालगायतका स्थानमा गोरु जुधाई प्रतियोगिता गरिँदै छ।

बिसौं हजार दर्शकका बिचमा सदियौंदेखि चल्दै आएको माघे संक्रान्तिको दिन गोरु जुधाई कार्यक्रम हामी नुवाकोटेका लागी गौरवको बिषय रहेको आयोजकले बताएका छन् ।

माघे संक्रान्तिको अवसरमा जुधाउन दर्ता भएका गोरुलाई एकले अर्कोसँग (वान भर्सेज वान) प्रतिस्पर्धा गराउन लागिएको छ। प्रतिस्पर्धामा विजेता हुने गोरु, धेरै समयसम्म जुध्ने गोरु, उत्कृष्ट प्रस्तुतिका साथ जुध्ने गोरुलगायतका शिर्षकमा गोरुधनी किसानलाई नगदसहित सम्मान गरिने आयोजकले जनाएको छ। नुवाकोटमा जुधाइने गोरुले स्पेनी बुलफाइटको झल्को दिने र  यो नेपालका लागि बिल्कुलै नयाँ प्रतियोगिताका रूपमा परिचित छ।

तारुकाको गोरु जुधाइलाई अनुसरण गर्दै अहिले नुवाकोटका विभिन्न स्थानमा गोरु जुधाउन थालिएको भएपनि उपयुक्त स्थान, आकर्षक गोरु, रोमाञ्चक प्रतिस्पर्धा, ऐतिहासिक महत्वलगायतका कारण तारुकाको गोरु जुधाइको आकर्षण र महिमा सबैभन्दा उत्कृष्ट रहेको आयोजकले बताए। ‘पशु जुधाएर मनोरञ्जन लिन हुँदैन भनेर अधिकारकर्मीहरुवाट विरोधका आवाज उठ्नेदेखि धेरैपटक कार्यक्रम रोक्न पनि खोजियो,’ विगतलाई स्मरण गर्दै आयोजक भन्छन्, ‘गोरु जुधाइको ऐतिहासिक तथा सांस्कृतिक महत्वलाई बचाउन र उनीहरूको जुध्ने रहेर पूरा गर्न निरन्तरता दिइएको हो।’

तारुकाको मौलिक परम्परा र इतिहास जीवन्त बनाउने गोरु जुधाई मेलामा पछिल्लो समय आन्तरिक र वाह्य पर्यटकहरू समेत आकर्षित हुन थालेका छन्। यस पटक नौं हल गोरु जुधाउने तयारी भएको क्लबले जनाएको छ। दर्शकहरूको थप मनोरञ्जनका लागि बेत्रावती बजारको नेवार समुदायको लाखे नाच, जिबजिबे रसुवाको ब्राम्हण समुदायको बालनभजन, मगर समुदायको सोरठी नाच, तामाङ सेलो र तामाङ जातीको झाँक्री नाच, पञ्चेबाजा सहितको झाँकी प्रदर्शन गरिने छ।

नुवाकोट र रसुवाको सिमा क्षेत्र ऐतिहासिक एवं धार्मिक तिर्थस्थल बेत्रावतीमा गोरु जुधाउने परम्परा छ । गोरु जुधाई हेर्न नुवाकोट, रसुवा, धादिङ, काठमाडौ, चितवन, मकवानपुर, गोरखावाटसमेत सर्वसाधारण आउने गरेका छन् ।

नुवाकोटको यस ऐतिहासिक गोरु जुधाउने पर्वलाई हरेक बर्ष आर्थिक सहयोग गर्दै आइरहेको काठमाडौं सानो-भर्यांग स्थित कामना ईन्टरनेशनल स्कुल/कलेजले यसपाली पनि आफ्नो सहयोगलाई निरन्तरता दिएको क्याम्पस प्रमुख महेश श्रेष्ठले जानकारी दिनुभयो । अध्ययन/अध्यापन कार्यमा अब्बल सानो-भर्यांग स्थित कामना ईन्टरनेशनल स्कुल/कलेज नुवाकोट, धादिंग, गोरखा, तनहु, लमजुंग, काभ्रे लगाएतका जिल्लाहरुमा निक्कै परिचित छ, उहांले भन्नुभयो ।