काठमाडौं । खेमलाल-हरिकला लामिछाने प्रतिष्ठानले तीन श्रष्टा र साधकलाई पद्मश्री पुरस्कार प्रदान गरेको छ । मंगलबार काठमाडौंमा आयोजित एक कार्यक्रममा २०८० सालको पद्मश्री साहित्य पुरस्कार प्रा.कृष्ण गौतमको उपन्यास ‘अद्वैत’लाई प्रदान गरिएको थियो । त्यस्तै यसैगरी पद्मश्री साधना सम्मान भारतको सिक्किमका पूर्वमुख्यमन्त्री तथा साहित्यिक तथा चिन्तक पवनकुमार चामलिङलाई प्रदान गरिएको छ ।
पद्मश्री गौरव पुरस्कार त्रिभुवन विश्वविद्यालयका पूर्वउपकुलपति, पूर्वराजदूत तथा नागरिक समाजका अभियन्ता प्रा.डा.केदारभक्त माथेमालाई प्रदान गरियो । प्रतिष्ठानका अध्यक्ष जीवा लामिछानेले तीनैजना श्रष्टा तथा साधकला तीन-तीन लाख नगदसहित सम्मान अर्पण गर्नुभएको थियो ।
समालोचक गौतम पूर्वीय तथा पाश्चात्य दर्शन र साहित्यका गहन अध्येता तथा उत्तरआधुनिक सिद्धान्तका व्याख्याता हुन् । उनका समालोचनात्मक र आख्यानात्मक एक दर्जनभन्दा बढी पुस्तक प्रकाशित छन् ।
चाम्लिङ लेखक, कवि एवं चिन्तक हुनहुुन्छ । उहाँ भारतको सिक्किम राज्यमा लगातार २५ वर्ष मुख्यमन्त्री बन्नुभएको थियो । चामलिङको पहलमा स्थापना भएको ‘निर्माण प्रकाशन’ले नेपाली भाषा र साहित्यको श्रवृद्धिमा महत्वपूर्ण योगदान पुर्याएको छ । कार्यक्रममा पूर्वमुख्यमन्त्री चाम्लिङले नेपाली भाषा तथा संस्कृतिको अभिभावकत्व नेपालले लिनुपर्ने बताउनुभएको थियो ।
पद्मश्री गौरब पुरस्कार पाउने माथेमा समतामूलक समाज निर्माणका लागि समर्पित शिक्षासेवी हुनुहुन्छ । उहाँ २०४७ सालको परिवर्तनपछि त्रिभुवन विश्वविद्यालयको उपकुलपति रहँदा गुणस्तरीय शैक्षिक विकास र प्राज्ञिक स्वतन्त्रताको पक्षमा योगदान गर्नुभएको थियो । कार्यक्रमका क्रममा माथेमाले सार्वजनिक शिक्षामा सबै देशवासीको समान पहुँच स्थापित हुनुपर्ने बताउनुभयो ।
प्रतिष्ठानले २०६३ सालदेखि हरेक वर्ष पद्मश्री साहित्य पुरस्कार, २०६७ सालबाट पद्मश्री साधना सम्मान र २०७८ देखि पद्मश्री गौरव पुरस्कार प्रदान गर्दै आएको छ ।
