काठमाडौं । प्रधानसेनापति अशोकराज सिग्देलले इजरायल र लेबनानको सीमा क्षेत्रमा खटिएका शान्ति सैनिकलाई लक्षित गरि आक्रमण हुन थाले नेपाली सैनिक फिर्ता ल्याउने कार्ययोजना तयार रहेको बताएका छन् । तर उनले अहिले नै नेपाली सैनिक फिर्ता गरिहाल्नुपर्ने अवस्था भने नरहेको प्रष्ट पारेका छन् ।

रक्षा मन्त्रालयमा मंगलबार आयोजित पत्रकार सम्मेलनमा उनले अहिले द्वन्द्वग्रस्त क्षेत्रमा रहेका ८७७ नेपाली सैनिक बंकरमा पूर्णतः सुरक्षित रहेको बताए ।

इजरायली डिफेन्स फोर्स (आईडीएफ) ले लेबनानको इस्लामिक विद्रोही संगठन हिजबुल्लाहमाथि १५ असोजदेखि स्थल कारबाही समेत थालेको छ ।

इजरायलका प्रधानमन्त्री बेन्जमिन नेतान्याहूले आइतबार संयुक्त राष्ट्रसंघीय मिसनलाई दक्षिण लेबनानबाट हटाउन समेत चेतावनी दिएका थिए । तर राष्ट्रसंघले शान्ति स्थापनाका लागि खटिएको सैनिक फिर्ता नहुने जवाफ दिएको छ । यही कारण सो क्षेत्रमा तनाव बढेको छ ।

नेपाली शान्ति सैनिकहरु गोली हानाहान भइरहेकै स्थानमा रहेपनि दुवै पक्षले शान्ति सैनिकलाई लक्षित गरेर कुनै कारबाही नगरेको प्रधानसेनापति सिग्देलले बताए ।

‘म आफैं पनि त्यहाँ जवान, कमाण्डरहरुसँग सम्पर्कमा हुन्छु, यूएन हेडक्वार्टरसँग पनि हामी प्रत्यक्ष सम्पर्कमा छौं’, उनले भने, ‘हामी समानान्तर रुपमा द्वन्द्वरत पक्षसँग पनि समन्वयमा हुन्छौं । त्यो हिसाबले हेर्दा नियतवश हाम्रो फौजलाई अफ्ठ्यारो पार्ने स्थिति सिर्जना हुने सम्भावना धेरै कम छ ।’

युद्धग्रस्त क्षेत्रमा दुर्घटनावश केही कुराहरु हुने सम्भावनालाई नकार्न नसकिने भन्दै उनले बंगलादेश र इन्डोनेसियाका गरेर ४ जना सैनिक घाइते भएको जानकारी दिए ।

‘बाहिर समाचारमा यूएनको एरियामा हमला भयो भनेर आउँछ । तर, तिनीहरु एक्सिडेन्टल हो । यूएन फोर्सलाई नै टार्गेटेड बम्बिङ भएको छैन’, सिग्देलले थपे, ‘त्यसको अर्थ के हो भने अहिलेसम्म दुवै पक्षले यूएनको उपस्थितिलाई स्वीकारेका छन् । त्यो हुनाले अहिलेसम्म हामी सुरक्षित छौं ।’

लडाइँ बढ्ने स्थितिमा के गर्ने भन्ने विषयमा संयुक्त राष्ट्रसंघको मुख्यालयले त्यसको योजना बनाएको उनले बताए । ‘त्यस्तो अवस्थामा नेपाली सेनाका तैनाथ फौजलाई कसरी फिर्ता ल्याउने वा कसरी सुरक्षित स्थानतर्फ लैजाने भन्ने योजना तयार गरेका छौं’, प्रधानसेनापति सिग्देलले पत्रकार सम्मेलनमा भने ।

अहिले इजरायल–लेबनानको सीमा क्षेत्रमा खटिएका शान्ति सैनिकका लागि लेभल थ्री सुरक्षा रणनीति लागू गरिएको छ । यसमा शान्ति सैनिकका अपरेशलन गतिविधिहरु ठप्प रहन्छन् भने सैनिकहरु बंकरमै बस्नुपर्ने हुन्छ ।

इजरायल–सिरियाको सीमा क्षेत्रमा पनि ५२ जना नेपाली शान्ति सैनिक कार्यरत छन् ।