काठमाडौं । रुकुमपश्चिमको बाँफिकोट गाउँपालिका –३ र ५ मा फैलिएको स्यार्पूतालमा सञ्चालित मोटर स्पीडबोट र डुङ्गाहरु अनुमति बिनै सञ्चालन भएको भन्दै बन्द गरिएको छ ।
पर्यटन प्रवर्धन र स्वरोजगारका लागि सञ्चालित डुङगाहरु आवश्यक कानुनी प्रक्रिया तथा अनूमतिबिनै सञ्चालन गरिएको पाइएपछि बन्द गरिएको हो । स्पार्पूतालमा सुरुमा काठका र केही वर्ष पहिलादेखि आधुनिक डुङ्गा सञ्चालन हुँदैआएका थिए । चार वटा आधुनिक डुङ्गा सञ्चालनमा थिए । भदौ दोस्रो साताबाट एक वटा मोटर स्पिडबोटसमेत सञ्चालनमा आएको थियो ।
मोटरबोटले आवश्यक कानुनी प्रक्रिया तथा अनुमतिबिनै सञ्चालनमा आएको र यसले क्षति हुनसक्ने भन्दै जिल्ला प्रशासन कार्यालयमा निवेदन परेको थियो । बाँफिकोट गाउँपालिकाका प्रमुख प्रशासकीय अधिकृत गणेश बिकका अनुसार मोटरबोट सञ्चालनको अनुमति पर्यटन बोर्डबाट लिनुपर्ने हुन्छ । बोर्डले वातावरणीय अवस्था, प्रभाव तथा मोटरबोट परीक्षण गरेर मात्र सञ्चालनको अनुमति दिने जानकारी दिनुभयो ।
यसअघि नियमित सञ्चालनमा परम्परागत डुङगा सञ्चालनको लागि आवश्यक कार्यविधिको निर्माण हुन बाँकि रहेको उहाँले बताउनुभयो । यसका लागि पालिकाले कार्यविधि तयार गरेर परम्परागत डुङ्गा सञ्चालनका लागि अनुमति दिन सक्छ ।
यसअघि गाउँपालिकाले मोटरबोट सञ्चालनको अनुमति दिएको थियो । उक्त कार्य पर्यटनबोर्डको क्षेत्राधिकार भएकोले गाउँपालिकाले उक्त अनुमति रद्द गरेको छ । त्यसयता मोटरबोटसहित अन्य परम्परागत डुङ्गाहरु बन्द छन् । सुन्दर स्यार्पूताललाई थप आकर्षक बनाउँदै पर्यटक तानिरहेका डुङ्गाहरु बन्द हुँदा यहाँ आउने पर्यटकहरुको सङ्ख्या घटेको छ ।
पर्यटकहरुले निराश हुँदै फर्किनुपरेको जनाएका छन् । डुङ्गा सञ्चालकहरुको व्यवसायमा प्रभाव परेको छ । दाङको घोराहीबाट घुम्न र स्यार्पूतालमा डुङ्गा चढ्न भनेर एक टिमका साथ आउनुभएका नारायण हमालले स्यार्पूमा डुङ्गा चढ्न नपाउँदा मन खल्लो भएको बताउनुभयो ।
सुन्दर तालमा रमाउँदै बोटिङ गर्ने रहर अधुरै छोडेर फर्किनुपरेको उहाँले जनाउनुभयो । हमालजस्तै केही आन्तरिक पर्यटकहरु डुङ्गामा रमाउने शोख पूरा नगरी फर्कन बाध्य भएका छन् । चाडपर्वको बेला गाउँ फर्केकाहरु सुन्दर तालमा बोटिङ गर्न नपाएको भन्दै गुनासो गर्ने गरेका छन् ।
स्यार्पूतालमा आधुनिक डुङ्गा सञ्चालन गर्दै आउनुभएका आदित्य मल्लले स्थानीय सरकारले चाँडै नै कार्यविधि बनाएर डुङ्गा सञ्चालनको अनुमति दिनुपर्ने बताउनुभयो ।
