काठमाडौँ । अध्ययनका लागि विदेश जाने विद्यार्थीलाई रोक्न सिपमूलक तथा रोजगारमूलक शिक्षामा जोड दिइएको छ ।
नेपाल विश्वविद्यालय पूर्वाधार विकास तयारी समितिले आयोजना गरेको ‘राष्ट्र निर्माणमा विश्वविद्यालयको भूमिका’ विषयक गोष्ठीलाई सम्बोधन गर्दै अर्थमन्त्री विष्णु पौडेलले विश्वविद्यालय सुधारका लागि नेपाल सरकारको समर्थन निरन्तर रहने बताउनुभयो । उहाँले प्राविधिक तथा सिपमूलक शिक्षामा जोड दिँदै समृद्धि राष्ट्र निर्माणका लागि विश्वविद्यालयको भूमिका महत्वपूर्ण रहने बताउनुभयो । उहाँले समृद्ध राष्ट्र निर्माणका लागि सिपमूलक तथा गुणस्तरीय शिक्षा आवश्यक पर्ने बताउनुभयो ।
कार्यक्रममा नेपाल विश्वविद्यालय पूर्वाधार विकास तयारी समितिका अध्यक्ष प्राडा अर्जुन कार्कीले उच्च शिक्षामा गुणस्तर सुधार गर्नुपर्ने बताउनुभयो । उहाँले उच्च शिक्षाका लागि बाहिरिएका जनशक्तिलाई रोक्न रोजगारमूलक शिक्षाको आवश्यकता रहने बताउनुभयो ।
उहाँले समृद्धि राष्ट्र निर्माणको अभियानलाई अघि बढाउन आवश्यक पर्ने सिपमूलक तथा गुणस्तरीय उच्च शिक्षाका लागि सार्थक योगदान पु¥याउने लक्ष्य राखेर नेपाल विश्वविद्यालयको स्थापना भएको बताउनुभयो ।
उहाँले विद्यमान विश्वविद्यालयको सबल र दुर्बल पक्षबाट पाठ सिक्दै समकालीन उच्च शिक्षा प्रणालीका आधारभूत सिद्धान्त र मान्यतालाई अवलम्बन गर्नुपर्ने बताउनुभयो । नेपाल विश्वविद्यालयले आफ्नै सङ्काय, आङ्गिक निकाय र पठनपाठनको गुणस्तरमाथि विशेष ध्यान दिने बताउनुभयो ।
सो अवसरमा उपप्रधान तथा अर्थमन्त्री विष्णु पौडेलले नेपाल विश्वविद्यालयको औपचारिक शुभारम्भको घोषणा गर्नुभयो ।
गोष्ठीमा प्राडा केशरजङ्ग बराल, डा. सुचिता प्याकुरेल, पूर्वपरराष्ट्रमन्त्री डा. विमला राई पौडेललगायतले कार्यपत्र प्रस्तुत गर्नुभएको थियो । कार्यक्रममा नेपालको शैक्षिक तथा सामाजिक विकासमा विश्वविद्यालयको प्रभाव, जिम्मेवारी र सम्भावित योगदानमाथि छलफल भएको थियो ।
