काठमाडौं । श्रमिकहरूको अवकाश उमेर बढाइने भएको छ । सरकारले अध्यादेशमार्फत केही कानुन संशोधन गर्दै श्रमिकको अवकाश अवधि बढाउने व्यवस्था गरेको हो ।
यसअघि ५८ वर्ष तोकिएको अवकाश उमेर कानुन संशोधन गर्दै ६० वर्ष पुर्याइएको प्रधानमन्त्री तथा मन्त्रिपरिषद् कार्यालय स्रोतले अनलाइनखबरलाई जानकारी दियो ।
शुक्रबार साँझ प्रधानमन्त्री निवास बालुवाटारमा बसेको बैठकले अध्यादेशमार्फत केही झन्झटिला देखिएका कानुन संशोधन गर्ने अध्यादेश ल्याएको हो ।
मन्त्रिपरिषद्बाट पारित भएको अध्यादेश राष्ट्रपति प्रमाणीकरण भएसँगै यस्तो कानुनी व्यवस्था कार्यान्वयनमा जानेछ ।
अध्यादेश ल्याउनुअघि प्रधानमन्त्री केपी शर्मा ओलीले दिउँसो राष्ट्रपति रामचन्द्र पौडेलसँग पनि भेटवार्ता गरेका थिए । उनी कानुनमन्त्री र मुख्यसचिवलाई लिएर राष्ट्रपति भेट्न पुगेका थिए । लगत्तै साँझ बसेको बैठकले अध्यादेश ल्याउने निर्णय गरेको हो ।
श्रमिकहरूको अवकाश उमेर ६० वर्ष पुर्याइएसंगै बिगत केहि समय देखी चर्चामा रहेको निजामती कर्मचारीहरुको अवकास उमेर पनि बढाउन सरकारलाई सहज भएको बताईएको छ ।
