काठमाडौं । नेपाल निर्माण व्यवसायी महासंघले आन्दोलन स्थगित गरेको छ । महासंघ र प्रधानमन्त्रीबीचको वार्ता सकारात्मक भएको भन्दै महासंघले आन्दोलनका पूर्वघोषित सबै कार्यक्रम तत्कालका लागि स्थगित गरिएको जनाएको हो । निर्माण उद्योगमा देखिएका विद्यमान समस्याका विषयमा छलफल गरी भावी रणनीति तय गर्न महासंघको आयोजनामा पुस २७ गते आयोजित राष्ट्रिय भेलाले १४ बुँदे मागसहित महासंघले आन्दोलन घोषणा गरेको थियो ।

आन्दोलनका पूर्वनिर्धारित कार्यक्रमअनुसार माघ १५ को अल्टिमेटमसहित प्रदेश निर्माण व्यवसायी महासंघहरूले सम्बन्धित प्रदेशका मुख्यमन्त्री तथा जिल्ला निर्माण व्यवसायी संघहरूले सम्बन्धित जिल्लाका प्रमुख जिल्ला अधिकारीसमक्ष ज्ञापनपत्र पेश गर्ने तथा केन्द्रमा महासंघले प्रधानमन्त्री, उपप्रधानमन्त्री, मन्त्री, प्रमुख राजनीतिक दलका नेता, विभिन्न समितिका सभापतिलगायतलाई ज्ञापनपत्र बुझाउने कार्य सम्पन्न गरेको पनि महासंघले जनाएको छ ।

सोही क्रममा माघ १६ गते प्रधानमन्त्री केपी शर्मा ओली र महासंघ प्रतिनिधिमण्डलबीच भएको छलफलका क्रममा महासंघका माग सम्बोधन गर्न प्रधानमन्त्रीबाट एक कार्यदल गठन गर्न निर्देशन भई सकारात्मकरूपमा उक्त छलफल टुंगिएकाले तत्कालका लागि महासंघबाट घोषित आन्दोलनका पूर्वघोषित सबै कार्यक्रम स्थगित गरिएको महासंघका महासचिव रोशन दाहालद्वारा बिहीबार जारी प्रेस विज्ञप्तिमा उल्लेख छ । महासंघले सरकारले निर्माण कार्यको भुक्तानी नदिएका कारण निर्माण व्यवसायी संकटपूर्ण अवस्थामा रहेको जनाउँदै आएको छ । सरकारले निर्माण कार्यको भुक्तानीको आश्वासनमात्रै दिँदै आएको तर भुक्तानीका लागि चासो नदिएको महासंघको आरोप छ । निर्माण व्यवसायीको भुक्तानी रोकिँदा सिमेन्ट, छडलगायतका निर्माण सामग्री उद्योगसमेत प्रभावित भएका छन् भने बजार चलायमान हुन सकेको छैन ।