काठमाडौं । नेपाल घुम्न आउने १० मुलुकका पर्यटकले नेपाल पेको क्युआरमार्फत् भुक्तानी गर्न सक्ने भएका छन् । चीन, दक्षिणपूर्वी एसिया र अफ्रिकालगायतका १४ ई-वालेट र मोबाइल बैंकिङ एप प्रयोगकर्ताले नेपाल भ्रमणमा रहँदा भुक्तानी गर्न सक्ने नेपाल क्लियरिङ हाउस (एनसिएचएल)ले जनाएको छ । नेपाल पे र स्मार्ट पे ‘इन्टरअपरेबल’ भएकाले पर्यटकले समेत नेपालमा रहँदा दुवै प्रणालीबाट भुक्तानी गर्न सकिने अवस्था रहेको एनसिएचएलको भनाइ छ । नेपाल पे क्युआरको सञ्चालन एनसिएचएलले गरिरहेको छ । यहाँका मर्चेन्टहरूले उक्त सेवा ग्राहकलाई उपलब्ध गराउँदा थप शुल्क लाग्दैन ।

हाल नेपालमा आठ लाखले नेपाल पे प्रयोग गरिरहेका छन् । बैंकहरूको सात सय ५३ स्थानीय तहमा पहुँच विस्तार भएकाले नेपाल पेको प्रयोग यहाँ भ्रमणमा आउनेले जहाँबाट पनि गर्न सक्ने अवस्था छ । मर्चेन्टहरूका लागि नेपाल पेले छुट्टै बिजनेस एप विकास गरेको छ । जसले भुक्तानीको एसएमएसमार्फत् जानकारी ढिलो आउँदा पर्यटकलाई पखाइरहन पर्ने अवस्था नआउनेसमेत दाबी गरेको छ । पर्यटकले सजिलै भुक्तानी गर्न सक्ने भएकाले स्थानीय व्यापारीको अन्तर्राष्ट्रिय बजारमा पहुँच पुग्ने र उनीहरूको व्यापारमा विस्तार हुन सक्ने बताइएको छ । हाल नेपालमा वार्षिक ११ लाख ४७ हजार पर्यटक आउने गरेका छन् भने पर्यटन क्षेत्रबाट वार्षिक ८२ अर्ब रुपैयाँ भित्रिने गरेको छ ।

नेपाल पेले ल्याएको अन्तरदेशीय भुक्तानीअन्तर्गत चीनको अलिपे, हङकङको अलिपे एचके, इटालीको तिनाबा, मकाओको एमपे, मलेसियाको टच एण्ड गो इ वालेट, माइपिबी, मंगोलियाको हाइपे, फिलिपिन्सको जी क्यास, थाइल्याण्डको ट्रु मनी, सिंगापुरको छान्जी पे र ओसिबिसी डिजिटल र दक्षिण कोरियाको ककाओ पे, नेभर पे र टस पेमा भुक्तानी गर्न सकिनेछ ।