काठमाडौं । दूध तथा दुग्धजन्य पदार्थको प्रवद्र्धन गर्ने उद्देश्यका साथ चितवनमा राष्ट्रिय डेरी एक्स्पो २०८१ हुने भएको छ । चितवन जिल्ला दुग्ध उत्पादक सहकारी संघ र चितवन उद्योग संघले बिहीबार चितवनमा पत्रकार सम्मेलन गर्दै आत्मनिर्भर रहेको डेरीजन्य उद्यमशीलता विकासमा सहयोग पुर्याउने उद्देश्यले डेरी एक्स्पोको आयोजना गर्न लागिएको जानकारी दिएको हो ।
एक्स्पोले दुग्ध क्षेत्रको बृहत् विकासका लागि साझा मञ्च प्रदान गर्ने, नयाँ प्रविधि र नवप्रवर्तन, बजार विस्तार र ब्राण्ड प्रवद्र्धनमा मद्दत पुग्ने चितवन जिल्ला दुग्ध उत्पादक सहकारी संघका अध्यक्ष किशोर बगालेले बताउनुभयो । किसान उद्योगी र व्यापारीलाई एकै थलोमा ल्याएर व्यावसायिक सञ्जालको अवसर सिर्जना गर्नु र उपभोक्तालाई डेरी उत्पादनको महत्व, फाइदा तथा गुणस्तरसम्बन्धी जानकारी प्रदान गर्नु एक्स्पोको उद्देश्य रहेको उहाँको भनाइ थियो । चितवन उद्योग संघका कार्यवाहक अध्यक्ष मदन घिमिरेले नेपालको डेरी उद्योगलाई अन्तर्राष्ट्रिय बजारीकरणका साथै नवप्रविधिबारे जानकारी दिन पहिलोपटक राष्ट्रिय डेरी एक्स्पोको आयोजना गर्न लागिएको बताउनुभयो ।
माघको २५ गतेदेखि २७ गतेसम्म भरतपुरमा आयोजना हुने एक्स्पोमा नेपाल र भारतका करिब ५० डेरीका परिकारदेखि नयाँ प्रविधि र उद्योगका स्टल रहने आयोजकले जनाएको छ । चितवनमा हाल तीन लाख ५० हजार लिटर दूध उत्पादन हुँदै आएको छ ।
