काठमाडौं । नाडा अटोमोबाइल्स एसोसिएसन अफ नेपालका अध्यक्ष करण चौधरी नेतृत्वको प्रतिनिधिमण्डलले श्रम, रोजगार तथा सामाजिक सुरक्षामन्त्री शरतसिंह भण्डारीसँग सिंहदरबारमा भेटवार्ता गरेको छ । मन्त्रालयले फागुन २६ र २७ गते राजधानीमा राष्ट्रिय श्रम तथा रोजगार सम्मेलनको आयोजना गर्न लागेकोे र त्यसको पूर्वतयारीका सन्दर्भमा छलफल भएको नाडाले जनाएको छ ।
खासगरी अटोमोबाइल क्षेत्रको तालिमका सम्बन्धमा सहकार्य गर्ने, आवश्यक जनशक्ति निर्माण गर्ने, अटोमोबाइल क्षेत्रबाहिरको सम्भावना पहिचान गर्ने, तालिम केन्द्र स्थापना गर्ने, अन्तरमन्त्रालयहरूबीच सहकार्य गर्ने, सहमतिका लागि आन्तरिक र राष्ट्रियस्तरमा गरी दुर्ई तहमा गर्ने जस्ता विभिन्न विषयमा छलफल केन्द्रित रहेको नाडाले जनाएको छ ।
मन्त्रालयले उत्पादकत्व अभिवृद्धिका लागि आन्तरिक रोजगार प्रवद्र्धन दशकको रणनीतिक कार्ययोजनाउपर पृष्ठपोषण लिने, आन्तरिक र वैदेशिक रोजगारीका क्षेत्रमा देखापरेका चुनौती विश्लेषण गरी आगामी नीतिगत र कानुनी परिमार्जनका लागि सुझाव लिने, श्रम तथा रोजगारयोग्य वातावरण सिर्जनाका लागि अन्तर-तह, अन्तरनिकाय समन्वय र सहकार्य स्थापना गर्नेे प्रमुख उद्देश्यका साथ सम्मेलन हुन लागेको हो । सम्मेलनका लागि मन्त्रालयले नाडासँग सहकार्य र समन्वय गर्नुका साथै नाडाको एउटा स्टलसमेत रहने नाडाले जनाएको छ ।
सो अवसरमा मन्त्रालयका सचिव डा. कृष्णहरि पुष्कर र सहसचिव डण्डुराज घिमिरेले अटोमोटिभ स्किल डेभलपमेन्ट काउन्सिल (एसडिसी) का कार्यसमिति सदस्य रितुन्च गुप्ता र प्रमुख कार्यकारी अधिकृत अरिण्डम लाहिरीले समेत आफ्ना धारणा व्यक्त गरेका थिए । छलफलमा वरिष्ठ उपाध्यक्ष आकाश गोल्छा, उपाध्यक्ष राजनबाबु श्रेष्ठ, महासचिव सुरेन्द्रकुमार उपे्रती, सहकोषध्यक्ष पंकज अग्रवाल, केन्द्रीय कार्यसमिति सदस्यद्वय कपिल शिवाकोटी, दिपेन्द्रकुमार मिश्रा, नवराज भुसाल, प्रकाश कपुरी, प्रदिपमान प्रधान, अभिक ज्योति, निलमणि पाठक, नवीनकुमार पारख, नारायणप्रसाद पौडेल र वाडाका अध्यक्ष दिपेन्द्र कोइरालाको उपस्थिति रहेको थियो ।
प्रतिनिधिमण्डलले सो मन्त्रालयअन्तर्गत रहेको राष्ट्रिय व्यावसायिक प्रशिक्षण प्रतिष्ठान (एनएभिटी) र नाडा अटोमोबाइल्स एसोसिएन अफ नेपाल (एनएडिए) बीच लागत साझेदारीमा अटोमोबाइल क्षेत्रमा रोजगारमूलक छोटो अवधिको तालिम विकास, सञ्चालन र प्रशिक्षार्थीलाई रोजगारीको सुनिश्चितता गर्ने विषयमा सम्झौताबारे पनि छलफल भएको थियो । गत जनवरीको १७ देखि २२ सम्म भारतको नयाँदिल्लीमा सम्पन्न भारत मोबिलिटी २०२५ का सन्दर्भमा नेपालमा दक्ष जनशक्ति तयार गर्न आवश्यक तालिम दिने विषयमा अटोमोटिभ कम्पोनेन्ट मेनुफेक्चर्स एसोसिएसन एसिएमए, एसडिसी र एनएडिएबीच त्रिपक्षीय चारबुँदे सम्झौता भएको थियो ।
