काठमाडौं । अखिल नेपाल फुटबल संघ (एन्फा)ले शहीद स्मारक ‘ए’ डिभिजन लिगका लागि आधिकारिक शीर्ष गीत (थिम सङ) निर्माण गर्न इच्छुक सर्जकहरूबाट आवेदन माग गरेको छ । एन्फाले बिहीबार सार्वजनिक गरेको सूचनामा इच्छुक संगीतकर्मीहरूले गीतको नमुना एन्फाको आधिकारिक इमेलमा पठाउन सक्ने जनाइएको छ । छनोटमा परेका गीतहरूलाई रेकर्ड गरिनेछ ।

थिम गीत निर्माणका लागि आवेदन दिने अन्तिम म्याद आगामी भदौ १५ (अगस्ट ३१) सम्म निर्धारण गरिएको छ । एन्फाले गीतका लागि केही मापदण्ड पनि तय गरेको छ ।

एन्फाका अनुसार गीतको अवधि कम्तीमा तीन मिनेट हुनुपर्नेछ । साथै, गीतमा फुटबल र प्रतिस्पर्धाको भावना, राष्ट्रिय गौरव र एकता, शहीदप्रतिको सम्मान तथा नेपाली फुटबलको इतिहास झल्कनुपर्नेछ ।

गीत नेपाली, अंग्रेजी वा दुवै भाषाको संयोजनमा प्रस्तुत गर्न सकिने एन्फाले जनाएको छ । यसअघि एन्फाले ‘ए’ डिभिजन लिगका लागि नयाँ ट्रफी र लोगो निर्माणका लागि पनि खुला आवेदन आहृवान गरिसकेको थियो ।(हिमालय टाईम्स)