काठमाडौं । शनिबार बंगलादेशको ढाकास्थित बसुन्धरा स्पोट्र्स ग्राउण्डमा सम्पन्न खेलमा नेपालले भुटानलाई ८-० गोलको फराकिलो अन्तरले हराउदै साफ महिला यू-२० च्याम्पियनसिपमा जित निकालेको छ । शुरुमा नेपालको जितमा स्ट्राइकर मीना देउवा र पूर्णिमा राईले हृयाट्रिक गर्दै आक्रामक प्रदर्शन गरेपछी मिडफिल्डर समीक्षा घिमिरे र वैकल्पिक खेलाडी कुसुम खतिवडाले एक-एक गोल थप्नुभयो । सुक्रिया मियाले तीन असिस्ट प्रदान गर्दै नेपाललाई फराकिलो जित दिलाउन सहयोग गर्नुभयो ।
खेलको सुरुवातमै नेपालले अग्रता लिएको थियो । सुरुवातको ४४ सेकेण्डमै मीनाले विपक्षीको गल्तीको फाइदा उठाउँदै गोल गर्दै प्रतियोगिताको सबैभन्दा छिटो गोल गर्न सफल हुनुभयो । नवौं मिनेटमा समीक्षाको प्रहार गोलकिपरबाट डिफ्लेक्ट भई पोस्टमा पुगेपछि अग्रता दोब्बर भयो ।
त्यसपछि नेपालले थप आक्रामक खेल प्रदर्शन गर्दै गोलको वर्षा ग¥यो । मीनाले १३औँ र २३औँ मिनेटमा थप दुई गोल गर्दै व्यक्तिगत दोस्रो हृयाट्रिक पूरा गर्नुभयो । पूर्णिमा राईले २३औँ, इन्जुरी समयको पहिलो मिनेट र खेलको अन्तिम सेकेण्डमा गोल गर्दै प्रतियोगितामा दोस्रो हृयाट्रिक गर्दै कुल १० गोल बनाउनुभएको छ । उहाँले यसअघि भुटानविरुद्धकै पहिलो खेलमा चार गोल गर्नुभएको थियो ।
दोस्रो हाफमा पूर्णिमाको स्थानमा मैदान प्रवेश गर्नुभएकी कुसुम खतिवडाले पनि गोल गर्दै नेपालको अग्रता सात गोल पुर्याउनुभयो । त्यसपछि सुक्रियाकै पासमा मीनाले व्यक्तिगत तेस्रो गोल गर्दै अन्तिम स्कोर ८-० बनाउनुभएको थियो ।
खेलमा नेपालले बलको राम्रो नियन्त्रण गर्दै विपक्षीलाई कुनै मौका दिएको थिएन । फरवार्ड वर्षा ओलीको अन्तिम मिनेटको प्रयास क्रसबारमा लागेपछि स्कोर थप्न भने सकेन । यस जितसँगै नेपालले पाँच खेलमा १२ अंक जोडेको छ ।(हिमालय टाईम्स)
