काठमाडौं । आइसिसी ट्वान्टी-२० विश्वकप छनोटको दोस्रो चरणको बन्द प्रशिक्षण शिविरका लागि नेपाली टोली भारत जाने भएको छ । यही जुलाई २१ देखि अगष्ट ३ तारिखसम्म भारतको बेंगलुरुस्थित नेसनल क्रिकेट एकेडेमीमा प्रशिक्षण शिविर आयोजना गरिने र उक्त शिविरमा २० खेलाडी सहभागी हुने नेपाल क्रिकेट संघ (क्यान) ले जनाएको छ ।

क्यानका अनुसार उक्त शिविरका लागि नेपालस्थित भारतीय दूतावासले समन्वय र भारतीय क्रिकेट बोर्ड (बिसिसिआई)ले सहयोग गरेको हो । शिविरमा सहभागी हुने खेलाडीमा रोहितकुमार पौडेल, कुशल भुर्तेल, आसिफ शेख, लोकेश बम, अनिलकुमार साह, भीम सार्की, आरिफ शेख, दीपेन्द्रसिंह ऐरी, कुशल मल्ल, रूपेशकुमार सिंह र विवेककुमार यादव हुनुहुन्छ ।
त्यसैगरी रिजन ढकाल, प्रतिश जिसी, नन्दन यादव, युवराज खत्री, साहब आलम, सन्दिप जोरा, सागर ढकाल, आकाश चन्द र शुभ कंसाकार पनि हुनुहुन्छ । अन्य खेलाडीले नेपालमै नियमित प्रशिक्षण गर्ने जनाइएको छ ।

सन्दीपसहित १२ खेलाडी नजाने
लेग स्पिनर सन्दीप लामिछानेसहित १२ खेलाडी विश्वकप छनोटको तयारी गर्न भारत नजाने भएका छन् । नेपाल क्रिकेट संघ (क्यान) ले शुक्रबार दोस्रो चरणको बन्द प्रशिक्षणका लागि भारत जाने २० खेलाडीको नाम घोषणा गरेको थियो । दोस्रो चरणको बन्द प्रशिक्षण भारतको बेंगलुरुमा हुनेछ ।

तर, २० जनाभित्र सन्दीपसहित तीव्र गतिका बलर सोमपाल कामी, करण केसी र कमलसिंह ऐरी अटाउनुभएन । स्पिनर ललितनारायण राजवंशी, अलराउन्डर गुल्शनकुमार झा, बसीर अहदम र किरण ठगुन्ना, आदिल अन्सारी पनि २० जनाको टोलीमा हुनुहुन्न । यीबाहेक पवन सर्राफ, शेर मल्ल र अर्जुन घर्ती पनि टोलीमा हुनुहुन्न ।(हिमालय टाईम्स)