काठमाडौं । नेपाली खेलाडी पलेशा गोवर्धनले दशौं एसियाली पारा तेक्वान्दो च्याम्पियनसिप (जी–४) मा कांस्य पदक हात पार्न सफल हुनुभएको छ । मलेसियाको कुचिङमा भएको पारा तेक्वान्दो प्रतियोगितामा उहाँले के-४४ वर्गअन्तर्गत महिला ५७ केजी तौल समूहमा उज्वेकिस्तानकी जुरेवा कमोलालाई पराजित गर्दै पदक सुनिश्चित गर्नुभएको थियो ।

पलेशाले पहिलो राउण्डमा १०-६ तथा दोस्रो राउण्डमा १३-० को सहज जित निकाल्दै सेमिफाइनल प्रवेश गर्नुभएको थियो । तर, सेमिफाइनलमा उहाँ चीनकी कि युजीसँग पराजित हुनुभयो ।

जुलाई २४ देखि अगष्ट १ सम्म सञ्चालन भएको प्रतियोगितामा पलेशासहित नेपालका पाँच खेलाडीले प्रतिस्पर्धा गरेका थिए । पुरुषतर्फ ५८ केजीमा भरतसिंह महता, ६३ केजीमा अमिर भ्लोन तथा महिलातर्फ ४७ केजीमा कामना प्रसाईं र रेणु तामाङ सहभागी हुनुभएको थियो ।