पलेशा र विजय, हाम्रो खेलकुद वर्ष खेलाडी

काठमाडौं । पलेशा गोवर्धन श्रेष्ठ र विजय सिञ्जालीले ‘हाम्रो खेलकुद’को वर्षको उत्कृष्ट खेलाडी अवार्ड जित्नुभएको छ । हाम्रो खेलकुद अनलाइनको दशौं वार्षिकोत्सवका अवसरमा आयोजना गरेको सम्मान कार्यक्रममा पलेशा र विजय उत्कृष्ट खेलाडी घोषित हुनुभएको हो । पलेशा पारा तेक्वान्दोकी खेलाडी हुनुहुन्छ भने विजय डोरी तानको खेलाडी हुनुहुन्छ ।

महिलातर्फ पलेशालाई कार्यक्रमका प्रमुख अतिथि तथा राष्ट्रिय खेलकुद परिषद् (राखेप) का सदस्य-सचिव टंकलाल घिसिङले अवार्ड प्रदान गर्नुभयो । पलेशाले पुरस्कार स्वरूप नगद २५ हजार रुपैयाँ प्राप्त गर्नुभयो । त्यसैगरी, पुरुषतर्फ विजयलाई पूर्व युवा तथा खेलकुदमन्त्री विराजभक्त श्रेष्ठले अवार्ड प्रदान गर्नुभयो । उहाँले पनि नगद २५ हजार रुपैयाँ प्राप्त गर्नुभयो ।

पलेशाका प्रशिक्षक कविराज नेगी लामालाई कार्यक्रममा विशेष सम्मान प्रदान गरिएको थियो । उहाँले पलेशालाई अन्तर्राष्ट्रियस्तरमा प्रतिस्पर्धा गर्न सक्षम बनाउने प्रशिक्षणमार्फत् नेपाली खेलकुदको छवि उज्यालो बनाउने कार्यमा महत्वपूर्ण भूमिका खेल्नुभएको छ ।

‘हाम्रो खेलकुद’ को दशौं वार्षिकोत्सवसँगै आयोजित खेलकुद कन्क्लेभमा खेल क्षेत्रमा विद्यमान समसामयिक विषयहरूमा दुई सेसनमा बहस गरिएको थियो । पहिलो सेसनमा महिला सहभागिता र अवसर रहेको थियो । जसमा आयशा शाक्य (तेक्वान्दो), सावित्रा भण्डारी ‘साम्बा’ (राष्ट्रिय फुटबल टोलीकी कप्तान), सलिना श्रेष्ठ (राष्ट्रिय भलिबल टोलीकी लिबेरो) र एरिका गुरुङ (कराँतेकी पदक विजेता) ले सहभागिता जनाउनुभएको थियो ।

दोस्रो सेसनमा युवा नेतृत्वको आवश्यकतामा बहस भएको थियो । जसमा विराजभक्त श्रेष्ठ (पूर्व युवा तथा खेलकुदमन्त्री), पारस खड्का (नेपाल क्रिकेट संघ, क्यानका सचिव), विक्रम लामा (नेपाल फुटबल खेलाडी संघका अध्यक्ष) र सचिन ढकाल (एफसी चितवनका अध्यक्ष) ले सहभागिता जनाउनुभएको थियो ।

नेपाल पर्यटन बोर्डका प्रतिनिधि सूर्य थपलियाले ‘नेपालमा खेलकुद पर्यटन : सम्भावना र आगामी बाटो’ शीर्षकमा प्रस्तुति दिनुभएको थियो । उहाँले नेपालमा ट्रेकिङ, पर्वतारोहण, साहसिक खेलकुद, दौड प्रतियोगितालगायतका माध्यमबाट खेलकुद पर्यटनलाई प्रवद्र्धन गर्न सकिने सम्भावनाबारे चर्चा गर्नुभएको थियो ।

प्रमुख अतिथि टंकलाल घिसिङले ‘हाम्रो खेलकुद’ले नेपाली खेलकुद पत्रकारिता र प्रचार-प्रसारमा खेलेको भूमिकाको सराहना गर्दै आगामी दिनमा अझ उत्कृष्ट योगदानको शुभकामना दिनुभएको थियो ।(हिमालय टाईम्स)