काठमाडौं । नेपाली गोलकिपर प्रशिक्षक मनिष तिम्सिना अफगानिस्तान राष्ट्रिय फुटबल टिमको गोलकिपिङ प्रशिक्षक नियुक्त हुनुभएको छ । उहाँले सामाजिक सञ्चालमार्फत् यसको जानकारी दिँदै खुसी व्यक्त गर्नुभएको हो । विदेशी टिममा गोलकिपिङ प्रशिक्षक बन्ने उहाँ पहिलो नेपाली गोलकिपर प्रशिक्षक हुनुहुन्छ ।
अफगानिस्तान फुटबल टोलीको मुख्य प्रशिक्षकमा नेपाली राष्ट्रिय टोलीका पूर्वप्रशिक्षक भिसेन्जो एनेस हुनुहुन्छ । अफगानिस्तानले काफा नेसनल कपका लागि ताजकिस्तानमा अभ्यास सुरु गरेको छ र मनिषले पनि काम सुरु गरिसक्नुभएको छ ।
मनिष तिम्सिना एएफसी गोलकिपिङ ‘ए’ डिप्लोमा लाइसेन्स प्राप्त गर्ने पहिलो नेपाली गोलकिपर प्रशिक्षकसमेत हुनुहुन्छ । मनिषले भारतमा गोकुलम केरला, पञ्जाब एफसी क्लबको गोलकिपर प्रशिक्षक भएर काम गरिसक्नुभएको छ । यस्तै, उहाँले मनाङ मस्र्याङ्दी क्लबको पनि गोलकिपर प्रशिक्षकका रूपमा काम गरिसक्नुभएको छ ।
विराटनगरका मनिषले खेलाडीका रूपमा थ्री स्टार, रानीपोखरी कर्नर टिम (आरसिटी), हिमालयन शेर्पा, बाँसबारी, स्वयम्भू, ब्रिगेड ब्वाइजबाट व्यावसायिक फुटबल खेल्नुभएको थियो । मनिषले पूर्वाञ्चलबाट पाँचौं राष्ट्रिय खेलकुदमा स्वर्ण पदक जित्नुभएको थियो ।(हिमालय टाईम्स)
