काठमाडौं । सोमपाल कामीको घातक बलिङमा मेलबर्न रेनेगेड्सलाई हराउँदै नेपालले अस्ट्रेलियामा जारी टप इण्ड टी-ट्वान्टी सिरिजमा लगातार दोस्रो जित दर्ता गरेको छ । बुधबार भएको खेलमा नेपालले मेलबर्नलाई ३३ रनले पराजित गर्दै सिरिजमा दोस्रो जित आफ्नो पोल्टामा पारेको हो । नेपालले दिएको १४० रनको लक्ष्य पछ्याएको मेलबर्नले निर्धारित २० ओभरमा १० विकेटको क्षतिमा १०६ रनमात्र बनाउन सक्यो ।
मेलबर्नका लागि अर्जुन नैर २६ रन बनाउँदा सोमपाल कामीको बलमा बोल्ड आउट हुनुभयो । जय लेमिरे १८ रनमा रन आउट हुनुभयो । ह्यारी डेक्सनले १६ रन थप्नुभयो । ओलिभर पिक १४ रनमा रन आउट हुनुभयो । नेपालका लागि सोमपाल कामीले पाँच विकेट झार्नुभयो ।
कुशल भुर्तेलले दुई विकेट लिनुभयो भने साहब आलम र रूपेश सिंहले समान एक विकेट लिनुभयो । त्यसअघि डार्बिनस्थित काजालिस एरिना पामस्र्टनमा टस जितेर ब्याटिङ गरेको नेपालले निर्धारित २० ओभरमा नौ विकेटको क्षतिमा १३९ रनको योगफल तयार पारेको थियो ।
नेपालका लागि कुशल मल्लले २९ र दिपेन्द्र सिंह ऐरीले २७ रन जोड्नुभयो भने लोकेश बमले २४ रन थप्नुभयो । यस्तै, रूपेश सिंह १६ रनमा नटआउट रहनुभयो । भीम सार्की १७ र आरिफ शेख १२ रन बनाउँदै पेभेलियन फर्किनुभएको थियो भने गुल्सन झा दुई र कुशल भुर्तेल एक रनमा आउट हुनुभएको थियो । रेनेगेड्सका लागि फर्गस ओनिल, लचलान बाङ्स, क्यालम स्टो र माइकल आर्चरले दुई-दुई विकेट लिनुभयो ।
नेपालले हालसम्म खेलेका पाँच खेलमध्ये सुरुवाती तीन खेलमा लगातार पराजित हुँदा त्यसपछि लगातार दुई जित निकालेको हो । नेपाल पहिलो खेलमा एनटी स्ट्राइकसँग ४२ रनले पराजित भएको थियो भने दोस्रो खेलमा बंगलादेश ‘ए’सँग ३२ रनले तथा तेस्रो खेलमा मेलबर्न स्टार्ससँग ३१ रनले पराजित भएको थियो ।
मंगलबार भएको चौथो खेलमा भने नेपाल होबार्टविरुद्ध ६६ रनले विजयी भएको थियो । नेपाल हाल पाँच खेलमा चार अंक जोडेर सातौं स्थानमा उक्लिएको छ । शीर्ष चार टोलीले सेमिफाइनल खेल्ने प्रावधान छ । सिरिजको अन्तिम खेलमा नेपालले शुक्रबार पाकिस्तानको साहिन्सविरुद्व खेल्नेछ ।(हिमालय टाईम्स)
